Ерөнхийлөгчийн Тамгын газар, Дотоод хэргийн их сургууль хамтран зохион байгуулж буй Монгол Улсын Ерөнхийлөгч, Зэвсэгт хүчний Ерөнхий командлагчийн нэрэмжит 21 дэх удаагийн “Сонсогчийн алдар” гардан тулааны тэмцээн “Степпе арена” цогцолборт эхэллээ.

Тэмцээний нээлтэд Монгол Улсын Ерөнхийлөгч, Зэвсэгт хүчний Ерөнхий командлагч У.Хүрэлсүх оролцож баг тамирчдад амжилт хүсэн ерөөлөө.

Тэрбээр, тэмцээний нэр хүнд, хамрах хүрээ, оролцогчдын тоо жилээс жилд нэмэгдэж, тамирчдын ур чадвар, амжилт дээшилж, гардан тулааны спортоор хичээллэдэг хүүхэд, залуучуудын тоо өсөж байгаад баяртай байгаагаа илэрхийллээ.

Тэмцээн нь “Эрүүл монгол хүн”, “Эх оронч Монгол” хөдөлгөөн, үндэсний сөрөн тэсвэрлэх стратегитай уялдаж, хойч үеэ төрт ёс, өв соёл, үндэсний үнэт зүйлээ эрхэмлэдэг эрүүл чийрэг, ёс суртахуун, сэтгэл зүйн зөв төлөвшилтэй болгоход  чиглэсэн олон ажлын нэг гэдгийг тэмдэглэлээ.

Тэмцээнийг “Тулаан”, “Өөрийгөө хамгаалах” гэсэн хоёр төрлөөр зохион байгуулах бөгөөд төрийн цэргийн болон хууль сахиулах байгууллагуудын алба хаагч, их, дээд сургуулиудын оюутан, сонсогч, суралцагч, “Бие хамгаалах урлагийн холбоо”, клуб, нэгдлийн тамирчид, хувь хүмүүс эрэгтэй, эмэгтэй төрлөөр өрсөлдөнө.

Жин тус бүрээр эхний гурван байрын эзнийг тодруулахаас гадна “Тулаан”, “Өөрийгөө хамгаалах” төрөлд түрүүлсэн, шилдэг техниктэй, уран зоригтой тамирчинд Улаан брет малгай олгох юм.

Мөн “Шилэгдмэл шүүгч”, “Шилдэг дасгалжуулагч”, тулааны төрөлд “Уран зоригтой тоглогч”, “Өөрийгөө хамгаалах төрөл”-д “Шилдэг ур чадвартай тамирчин” шалгаруулна.

Түрүүлсэн багт Ерөнхийлөгчийн нэрэмжит шилжин явах цом олгох бөгөөд  гурван жил дараалан түрүүлбэл цомыг үүрд хадгалуулах юм.

Тэмцээн хоёр өдөр үргэлжилж шилдгүүдээ тодруулна.

“Сонсогчийн алдар” тэмцээнийг Ардын багш, боловсрол судлалын ухааны доктор, профессор, Дотоод хэргийн их сургууль, МУБИС-ийн хүндэт профессор, цагдаагийн хурандаа С.Хаянгарваа санаачилсан юм.

1996 оноос төрийн цэргийн болон хууль сахиулах байгууллагын албан хаагчид, цэрэг, цагдаагийн сургуулийн сонсогчид, тулааны урлагийн клуб, холбоо, нэгдэл, хувь хүмүүсийн хүрээнд улс, олон улсын хэмжээнд зохион байгуулж ирсэн түүхтэй.

1998 оноос эмэгтэй тамирчид, хүүхэд, залуучуудыг насны ангилал, жингээр оролцуулж эхэлсэн. 2003, 2008, 2013 онд Орос, Украйн, Казахстан, Иран, Япон, Чех, Солонгосын тамирчид оролцож байлаа.

Тэмцээнээс Холимог тулааны дэлхийн хошой аварга Ж.Нарантунгалаг, Олон улсын каратэгийн хошой аварга, Дэлхийн таеквондогийн аварга Ө.Гантөмөр, мэргэжлийн боксын дэлхийн хошой аварга Ч.Цэвээнпүрэв нарын тамирчин төрөн гарчээ.

Манай улсад тулааны урлагийн 20 орчим төрлөөр 50 гаруй мэргэжлийн холбоо, клуб, 1,000 орчим секц, дугуйлан үйл ажиллагаа явуулж байна.