Намрын чуулган эхлэхэд сар хагасын хугацаа үлдлээ. Уг чуулганаар хэлэлцэх улс төрийн, эдийн засгийн асуудал олон болж байх шиг байна. Тэдгээрийн нэг нь УИХ-ын сонгуулийн хангайн бүсийн тойрогт нөхөн сонгууль явагдаж магадгүй нөхцөл үүссэн. Дээд шүүхээс 2024 оны сүүлчээр УИХ-ын гишүүн Дав.Цогтбаатарт ял шийтгэсэн ч энэ шийдвэр хэрхэн хэрэгжих нь тодорхойгүй хагас жил явсан. Харин УИХ-ын хаврын чуулганы сүүлч хавиар өөр “уур амьсгал”-тайгаар яригдаад эхэлсэн. Тодруулбал, гишүүд “...Шүүхийн шийдвэр хэрэгжих ёстой” гэсэн байр суурийг илэрхийлцгээсэн. Тухайлбал, УИХ-ын Ёс зүй, дэгийн байнгын хорооны дарга Б.Баярбаатар “…Дав. Цогтбаатар гишүүний асуудлыг Дээд шүүхийн шийдвэрийг биелүүлэх ёстой. Цэцэд гомдол маргаан гаргах ёстой. Хамтын шийдвэрийг гаргах ёстой. Байнгын хороо хамтаар шийдвэр гаргана. Дав.Цогтбаатар гишүүнийг эгүүлэн татах ёстой гэдэг байр суурьтай л байгаа. Эгүүлэн татах эрх чинь ард түмэнд л байгаа” гэсэн. Мөн УИХ-ын гишүүн Б.Энхбаяр “…Хөгжлийн банкны сонсголын үеэр Дав.Цогтбаатар гишүүнийг гэм буруутай гэж харж байгаагүй. Гэхдээ шүүхийн шийдвэр гарчихаад байна. Хуульд мухардал гэж байхгүй. Хэрвээ мухардалд орсон бол Үндсэн хуулийн цэц мухардлыг арилгах үүрэгтэй. УИХ мухардсан бол Үндсэн хуулийн цэцэд хүсэлт гаргаж, асуудлаа шийдвэрлүүлэх ёстой” гэсэн юм. Үүнээс гадна, хангайн бүсэд болох нөхөн сонгуульд нэр дэвших улстөрчид бодитойгоор “хөдлөөд” эхэллээ. Эндээс харвал, УИХ өөрөө, эсвэл Үндсэн хуулийн Цэцийн “тусламж”-тайгаар Дээд шүүхийн шийдвэр хэрэгжих эсэхийг шийдэхээр болж байх шиг байна.

Хэрвээ, хангайн бүсэд нөхөн сонгууль болох юм бол УИХ-ын 2024 оны сонгуулиар тус тойрогт өрсөлдөөд дөнгөж өмнүүрээ “таслуулсан” Ерөнхий сайд Г.Занданшатар нэр юдэших магадлал өндөр байна. Мөн МАН-ын Нарийн бичгийн дарга Д.Сумьяабазар ч яригдаад эхэллээ. Түүнчлэн, 2024 оны сонгуульд өндөр санал авсан АН-ын А.Адьяасүрэн, эсвэл Э.Болорчулуун, Үнэн ба зөв намын А.Отгонбаатар, “Үндэсний эвсэл”-ийн  Ц.Дагвадорж, ХҮН намын Б.Урангоо, П.Тамир хоёрын нэг нь, ИХН-ын Г.Энх-Амгалан нар нэр дэвшиж магадгүй юм.

Эх сурвалж: “Зууны мэдээ” сонин

2025 ОНЫ ДОЛООДУГААР САРЫН 29. МЯГМАР ГАРАГ. № 137 (7634)