Ховд-Улаангом чиглэлийн хатуу хучилттай авто замын бүтээн байгуулалтын ажил өнөөдөр албан ёсоор эхэллээ.

Олон жил хүлээгдсэн, хоёр аймгийг авто замаар холбох уг бүтээн байгуулалтыг УИХ-ын дарга Д.Амарбаясгалан нээлээ. Энэ зам ашиглалтад орсноор: 

• 1-рт, аймгийн төвүүдийг хатуу хучилттай замаар холбох замаар бүс нутгийн тээвэр, логистикийн тогтолцоо шинэ түвшинд хүрч, хөгжлийн томоохон суурь тавигдана.
• 2-рт, Увсын Боршоо, Ховдын Булган боомтыг холбох баруун бүсийн хоёр дахь тэнхлэгийн замын нэг хэсэг болж, улсын боомтын хөгжил, олон улсын тээврийн сүлжээтэй уялдах боломжийг нээнэ.
• 3-рт, Ховд, Увс аймгийн хэд хэдэн сумыг хамарч, орон нутгийн хөгжилд шууд болон шууд бус байдлаар чухал хувь нэмэр оруулна. 
 
163 км үргэлжлэх уг авто замын бүтээн байгуулалт гурван хэсгээс бүрдэж байна. Төслийн нийт төсөв нь 55.63 сая ам.доллар. Энэ онд 5.56 сая ам.долларын санхүүжилт тавьжээ. Монгол Улс, Азийн Хөгжлийн банк хооронд байгуулсан санхүүжилтийн хөтөлбөрийн дагуу уг төсөл 2028 оны зургааддугаар сарын 22-нд бүрэн ашиглалтад орно.

Аймгийн иргэд энэ авто замын бүтээн байгуулалтыг олон жил хүлээсэн, хатуу хучилттай авто замгүйн улмаас тээвэр явахад хүндрэлтэй, эвдрэл их тохиолддог талаар ярьжээ.

Тиймээс уг зам ашиглалтад орвол юун түрүүнд тээврийн зардал буурч, зам дагасан худалдаа үйлчилгээ ч өргөжих боломжтой гэлээ. Баруун бүсийн иргэдийн хувьд зах зээл рүү буюу Улаанбаатар, Замын-Үүд орохын тулд 1500-2000 км зам туулдаг. Авто замын бүтээн байгуулалтуудыг эхлүүлснээр өөрсдийн гэсэн зах зээлтэй болж, боомтуудаараа дамжуулан хөгжих боломжтой юм. 
 
Төслийн гүйцэтгэгч БНХАУ-ын "Лонг жиан роуд энд Бридж" ХХК-ийн хувьд Ховд-Говь-Алтай, Сонгино – Тосонцэнгэл зэрэг улсын болон аймгийн чанартай дөрвөн авто замын нийт 800 гаруй км хатуу хучилттай авто замыг барьж ашиглалтад оруулсан туршлагатай гэлээ. Уг бүтээн байгуулалтад 160 гаруй техник хэрэгсэлтэйгээр оролцож, гурван жилийн хугацаанд чанарын шаардлагад нийцсэн авто замаа хүлээлгэн өгнө гэдгийг онцоллоо.