Нийслэлийн ИТХ-ын ээлжит бус V хуралдаанаар Хэсгийн ахлагч нарын урамшууллын хэмжээг шинэчлэн тогтоох тухай асуудлыг хэлэлцлээ. Хэсгийн ахлагч нар нь гурвалсан гэрээний хүрээнд сарын 1.000.000 төгрөгийн урамшуулал авдаг байна. Тэгвэл энэхүү урамшууллын хэмжээг 20 хувиар буюу 200 мянган төгрөгөөр нэмэх асуудлыг хуралдаанаар хэлэлцэж төлөөлөгчдийн олонхын саналаар дэмжиж баталлаа.

Нийслэлийн 9 дүүрэг 204 хороотой бөгөөд нийт 1858 хэсгийн ахлагч ажилладаг байна. Нэг хэсгийн ахлагч гэр хороололд дунджаар 200-250 өрх, байшин хороололд 250-300 өрх хариуцаж төрийн бодлого, шийдвэр, нийслэл, дүүргээс зохион байгуулж, хэрэгжүүлж буй үйл ажиллагааг иргэн, аж ахуйн нэгж, байгууллагад шуурхай хүргэх,  төр иргэний хамтын ажиллагааг бэхжүүлэх үндсэн чиг үүргийг хэрэгжүүлэн ажиллаж байна. Товчхондоо төрийн анхан шатны үйлчилгээг үзүүлж буй ажилтнууд хэдий ч өнөөдрийг хүртэл төрийн албан хаагчийн тоонд ордоггүй, төрийн байгууллагуудын бүхий л судалгаа, мэдээллийг иргэдэд хүргэж ажилладаг, айл өрхүүдийн нийгмийн асуудлуудын судалгааг газар дээр нь явж гаргадаг, хог хүртэл ачилцдаг хэр нь урамшууллын хэмжээ бага, нийгмийн халамжийн ямар ч дэмжлэггүй зэрэг олон асуудал байгааг төлөөлөгчид онцоллоо.

Тухайлбал:

НИТХ-ын төлөөлөгч Т.БАТЦОГТ: Хэсгийн ахлагч нарын үндсэн үүрэг төр иргэний хамтын ажиллагааг бэхжүүлэх. Цаашид улс төрч, улс төрийн намын үзэл санааг баримталж ажиллахгүй байхыг анхаараарай.

НИТХ-ын төлөөлөгч Ү.ОЮУНЗУЛ: Алслагдсан гэр хорооллын иргэдийг төрийн үйлчилгээг авахад хэсгийн ахлагч нар гол нөлөө үзүүлдэг. Ихэнх нь эмэгтэй, хийдэг ажил хүнд, авдаг цалин бага

НИТХ-ын төлөөлөгч Б.МЯГМАР: Хэсгийн ахлагч нар төрийн албан хаагчийн тоонд ордоггүй, амралтгүй ажилладаг. 204 хорооны 1900 хэсгийн ахлагчийн нийгмийн халамжийн асуудлыг шийдэх хэрэгтэй

НИТХ-ын төлөөлөгч Ц.ТӨРХҮҮ: Хэсгийн ахлагч нар иргэдийг төртэй холбодог төрийн үйлчилгээний ажилтан. Тиймээс статусыг нь төрийн үйлчилгээний ажилтан болгох саналтай байна. Ингэж байж хариуцлага ярих боломжтой

НИТХ-ын төлөөлөгч Л.ХОСБАЯР: Тогтоолын төслийн заалтыг өөрчлөн найруулах саналтай байна

НИТХ-ын төлөөлөгч Т.ОТГОНБОЛД: Хороон дээр хэсгийн ахлагч нарын хийхгүй ажил гэж байхгүй. Нийгмийн баталгааг онцгой анхаарах хэрэгтэй. Урамшууллыг нь ажилласан жилийн шатлалаар тооцдог болох боломжтой юу.

НИТХ-ын төлөөлөгч Д.УНДАРМАА: Төрийн анхан шатны үйлчилгээг хэсгийн ахлагч нар иргэдэд хүргэдэг хэр нь өнөөдрийг хүртэл гэрээт ажилтан гэж явдаг нь утгагүй. Адилхан л өрнөөс өр, зээлээс зээлийн хооронд явдаг ажилтнууд шүү дээ

НИТХ-ын төлөөлөгч Б.СЭМЖИДМАА: Гэрээсээ гарах боломжгүй ахмадууд, өвчтэй хэвтэрт байгаа хүмүүс, хүүхэд харах хүнгүй зэрэг тулгамдсан асуудалтай төрийн үйлчилгээг авч чадахгүй хүмүүс хэсгийн ахлагчдаа хамгийн түрүүнд ханддаг.

НИТХ-ын төлөөлөгч О.ЗУНДУЙДОРЖ: Хэсгийн ахлагч нар төрийн анхан шатны нэгж хэр нь үнэхээр нийгмийн баталгаа байхгүй. Дүүргийн Засаг дарга нар хүртэл үүдэндээ суулгаад хүлээж авч уулздаггүй. Төрийн үйлчилгээний ажилтан болгох ажлыг миний хувьд тууштай дэмжээд явна.

НИТХ-ын төлөөлөгч Ж.БАТБАЯСГАЛАН: Нийслэлийн Засаг даргын бүрэн эрхийн хүрээнд Дүүргийн Засаг дарга нарын шууд удирдлага дор хэсгийн ахлагч нарыг төрийн үйлчилгээний ажилтан болгох эрх зүйн боломж бий