Авлигатай тэмцэх газраас төрийн 16 яам, 34 агентлаг, 21 аймгийн Засаг даргын тамгын газар, нийслэл, дүүргийн 10 Засаг даргын тамгын газар, нийт 81 байгууллагыг хамруулан “Бодлогын шийдэл” ТББ-аар “Шударга байдлын үнэлгээ-2024” судалгааг хийлгэсэн байна.

Шударга байдлын үнэлгээний судалгааг АТГ-ын даргын 2015 оны 12 дугаар сарын 10-ны өдрийн А/129 тушаалын I хавсралтаар батлагдсан “Шударга байдлын үнэлгээний аргачлал”-ын дагуу хийж гүйцэтгэжээ. Шударга байдлын үнэлгээ нь гадаад шударга байдал, дотоод шударга байдал болон бодлогод оролцогчдын үнэлгээнээс бүрддэг байна.

Гадаад шударга байдлын үнэлгээ нь төрийн байгууллагаар үйлчлүүлэн үйлчилгээ авсан иргэд, аж ахуй нэгж, байгууллагуудын өгч буй үнэлгээгээр тодорхойлогддог бөгөөд “Шударга байдлын үнэлгээ-2024” судалгаанд төрийн 81 байгууллагаар үйлчлүүлсэн 10840 иргэд, ААН-ийн төлөөлөл, 2660 төрийн албан хаагчдын төлөөлөл, 1530 бодлогод, оролцогч, шинжээчид хамрагдсан байна.

Байгаль орчин, уур амьсгалын өөрчлөлтийн яамны хувьд 2022, 2023 онд 16 яамны үйл ажиллагаанд шударга байдлын үнэлгээгээр 14 дүгээр байр буюу сүүлийн 3 байгууллагын нэгээр үнэлэгдэж байсан бол 2024 оны Шударга байдлын үнэлгээгээр 16 яамнаас 8 дугаар байранд үнэлэгдсэн байна. Мөн төрийн 81 байгууллагаас 28 дугаар байранд үнэлэгдсэн байна.

БОУАӨЯ-аас 2025 онд шударга байдлын үнэлгээний гадаад болон дотоод шударга байдал, бодлогод оролцогчдын үнэлгээг сайжруулахад анхаарч, Авлигын эсрэг хууль тогтоомжийн хэрэгжилтийг сайжруулах, авлига, ашиг сонирхлын зөрчлөөс урьдчилан сэргийлэх, төрийн захиргааны төв байгууллагын үйл ажиллагааны нээлттэй, ил тод байдлыг хангах, төрийн албан хаагчийн ёс зүйн хэм хэмжээг сахих, төрийн үйлчилгээг хүнд сурталгүй, түргэн шуурхай хүргэх, аливаа зөвшөөрлийг цахимжуулах талаар холбогдох арга хэмжээг авч хэрэгжүүлэх, сургалт, сурталчилгаа, соён гэгээрүүлэх үйл ажиллагааг тогтмол зохион байгуулахаар төлөвлөн ажиллаж байна.