Монгол Улсын Ардчилсан шинэ Үндсэн хуулийг батлалцсан Ардын Их Хурлын депутатууд, Улсын Бага Хурлын гишүүдэд хүндэтгэл үзүүлэх арга хэмжээг Баянгол дүүргийн иргэдийн Төлөөлөгчдийн Хурал зохион байгууллаа.

Уг арга хэмжээнд дүүргийн иргэдийн Төлөөлөгчдийн хурлын дарга П.Өлзийнаран болон иргэдийн Төлөөлөгчдийн Хурлын зөвлөлийн гишүүд, хурлын хороодын дарга нар, дүүргийн Засаг дарга Ө.Сумъябаатар нар оролцов.

Хурлын дарга П.Өлзийнаран арга хэмжээг нээж хэлсэн үгэндээ “Өнөөдөр энэ танхимд Монгол Улсын түүхийг бүтээлцсэн бахархалт хүмүүс хуран цуглажээ. Ингэж хэлэх учир нь ардчилсан Үндсэн хуулийг батлахад оюун ухаан, мэдлэг, туршлага, эх орноо гэсэн бүхий л зүрх сэтгэлээ зориулсан АИХ-ын депутатуудын төлөөлөл бидний урилгыг хүлээн авч хүрэлцэн ирээд байна.

1992 оны ардчилсан Үндсэн хуулийг Ардын Их Хурлын 430 гаруй депутат, Улсын Бага Хурлын 50 гаруй гишүүн 76 хоног хэлэлцэж баталсан түүхийг монгол хүн бүр мэднэ гэж итгэдэг. Үндсэн хуулийн оршилд “Хүмүүнлэг, иргэний ардчилсан нийгмийг цогцлоон хөгжүүлэх”-ийг тунхаглаж, хүний эрхийг дээдэлж, ардчилал, олон ургальч үзэл, эдийн засгийн чөлөөт байдал, төрийн эрх мэдэл хуваарилах, нутгийн өөрөө удирдах ёс, хараат бус, шударга, бие даасан шүүхийн тогтолцоог анх удаа баталгаажуулсан.

Ардчилсан Үндсэн хуулийн зүйл заалт бүрт Та бүхний мэргэн ухаан шингэж, үеийн үед үр хойчдоо бахархал болон тэмдэглэгдэж ирсэн билээ” хэмээн онцлов.

Мөн дүүргийн Засаг дарга Ө.Сумъяабаатар болон хүрэлцэн ирсэн АИХ-ын депутатууд, Улсын бага хурлын гишүүдийг төлөөлж Хөдөлмөрийн баатар, гавьяат тээвэрчин Р.Раш, ШУТИС-ийн менежментийн сургуулийн багш доктор, Монгол Улсын гавьяат багш Х.Пүрэвдагва нар үг хэллээ.

Ийнхүү ахмадын сургаалыг сонсож халуун дотно яриа өрнүүлсэн сайхан арга хэмжээ болж өндөрлөлөө.