XVII жарны хөхөгчин могой жилийн сар шинийн баярыг тохиолдуулан Монголын Үндэсний музей, “Дуут урлан” ХХК-тай хамтран 2025 оны хоёрдугаар сарын 11-ний 11:40 цагт “Сар шинийн үнэт бэлэг-Өв тээсэн үнэ цэн” үзэсгэлэнгээ нээнэ.

Тус үзэсгэлэн нь Монголчуудын уламжлалт өв соёлыг орчин үед инноваци, шинэ технологи нэвтрүүлэн шинээр урлан бүтээсэн “Дуут урлан” ХХК-ийн урчуудын бүтээлүүд дэлгэгдэж буйгаа онцлог юм. “Дуут урлан” ХХК 33 жилийн хугацаанд ур, ухаанаа шингээн монгол орны алт, мөнгө, зэс, цайрын агууламжтай металлаар бүтээсэн “Чингис хаан”, “Нүүдэлчин монгол”, “МЭӨ шатар”, “Хүннүгийн Атилла ба Ромын эзэнт улс”, “Мандухай сэцэн хатан ба Цодгор хүү”, “Монгол наадам”, “Болдоггүй бор өвгөн”, “Уран бэрийн нүүдэл” зэрэг 36 шатрыг үзэсгэлэнд олон нийтэд толилуулна.

Мөн цагаан сарын уламжлалт эд эдлэл сав суулга, идээ ууцны цар, Мөнгөн завъяа, Даш бумба, дөрвөн хүчтэн урласан эх төлийн загвартай мөнгөн халбага сэрээ, эхнэр хүний иж бүрэн толгойн чимэг зэрэг монгол дархны ур ухаан шингэсэн чамин бүтээлүүдийг дэлгэх юм. Монгол шатрын түүхэн гарал үүслийг гэрчлэх археологийн олдвор, уран зохиолын дурсгал, түүхэн эх сурвалжуудыг нарийвчлан судлах, Монгол шатар эртний хэлбэрүүдийн нэг гэдгийг нотлохуйц онол, дүгнэлт, эх сурвалж, шинжлэх ухааны баримт, материалуудыг танилцуулах эрдэм шинжилгээний хурал, хэлэлцүүлэг болон Монголын шатрын холбоотой хамтран Монгол туургатны дунд ОУ-ын шатрын тэмцээнийг зохион байгуулахаар төлөвлөн ажиллаж байна.

Энэхүү үзэсгэлэнг олон нийтэд хүргэж үзэсгэлэн зохион байгуулж ажиллахад Монгол Улсын Ерөнхийлөгчийн Тамгын газар, Соёл, спорт аялал жуулчлал залуучуудын яам, Монголын шатрын холбоо, Эртний шатар судлалын хүрээлэнгийн хамт олон хамтран ажиллаж дэмжлэг үзүүллээ. Уг үзэсгэлэн 2025 оны гуравдугаар сарын 15-ны өдрийг хүртэл Монголын Үндэсний музейн үзэсгэлэнгийн танхимд олон нийтэд нээлттэй ажиллана.

Харилцах утас: 70110913, 99082459, 80190844