Нийслэлийн Засаг дарга асан Э.Бат-Үүл цахим орчинд байр сууриа илэрхийллээ. Тэрбээр

"-Төв,Сэлэнгэ аймгаас бусад аймгууд нь засмал замаар холбогдож чаддаггүй

-Төв,Сэлэнгэ аймгийн төв, Эрдэнэт хотоос бусад аймаг, хотууд нь бүтэн 24 цагаар ажиллах цахилгаанд холбогдоогүй, өдрийн 12 цагийн хязгаарлалтай дизель станцаар ажилладаг эрчим хүчтэй, хөдөө сумд нь лааны гэрэлд амьдардаг

-Төрийн томчуул нь орж үзэх эрхгүй,дэлхийн хамгийн том ураны үйлдвэрлэл эрхэлдэг Мардай гэх нууц хоттой

-Бүх ашгийг нь Москва хуу хурааж авдаг ганц том уул уурхайн Эрдэнэт үйлдвэртэй

-Цагаан сар нь хориотой оросжсон үндэсний соёлтой

-Дайн болоогүй атал, карт талоноор бараагаа түгээдэг Улаанбаатарын 3 хүнсний үйлдвэртэй

-Зөвлөлтөд тушаадаг махныхаа үлдэгдэлийг дэлгүүртээ цавчин хуваахуйд иргэд нь 3-5 цаг оочёрлон алалдаг

-Ховор барааны орос дэлгүүрийн гадаа царай алдан зогсдог ийм л хөгийн Москвагийн монголыг, Монголын монгол болгох үйл хэргийг Пунсалмаагийн Очирбат өлгийдөн авсан юм даа!

Түүний өлгийдөн авсан Монголын монгол өнөөдөр яаж “аархаж” буйг хар даа! Бүх аймгаа засмал зам, эрчим хүч, гар утсаар холбочихсон; супермаркетууд нь бараагаар хахчихсан;орос машин голоод унадаггүй иргэд нь барууны машинаар замаа түгжчихсэн; утаанаас зугатаж Тайланд, Вьетнам, Америк руу зусдаг; дөнгөж нядалсан шинэ мах биш бол өөр мах голоод авахаа байсан;эр эмгүй жингийн хэтрэлттэй атлаа ядуучуудаараа шантаажлан эрх чөлөөт байдлаа гутааж тоглодог хулхи шалиг “гэгээнтэн”-үүдтэй; засгийн газраа огцоруулна гэх жагсаал цуглаантай; уул уурхайг рэкетлэж хөлждөг улстөрчид, босоо хөхүүдтэй; цагаан сар, наадмынхаа идээ будаа,гангараагаар уралдах залуус гээд ёстой л өөрийн зоргоор “галзуурч” байна дөө!

Эрх чалөөгөө олсон хүмүүс юунд ч сэтгэл нь ханахаа байдаг юм, ингэх нь зөв шүү дээ,урагшлана! хэмээх түүний хошигнол нь юутай гүн утгатай атлаа зөнч мэргэн байж вэ?! Намайг цаашлуулж байна л гэж би тухайн үедээ бодож билээ.

Эрх чөлөөндөө эрхэлсэн цадиггүй монголчууддаа тэр үнэхээр хайртай байжээ!" хэмээжээ.