Нийслэлийн хүн амын өвлийн улирлын махны хангамжийн тогтвортой байдлыг хадгалах, орон нутгийн малчдын малын мах, цагаан идээ, тариаланчдын жимс, жимсгэнийг дундын зуучлалгүйгээр хэрэглэгчдэд хүргэх зорилгоор “Өвлийн идэш” өргөтгөсөн худалдааг нийслэлээс энэ сарын 12-ноос зохион байгуулж эхэлсэн. Өнөөдөр дөрөв дэх өдрөө үргэлжлэн гарч байна. Тодруулбал, “Хоршоологчдоос – Хотынхондоо” уриан дор Хан-Уул дүүргийн 15 дугаар хороо, Төв цэнгэлдэх хүрээлэнгийн гадна талбайд болж буй юм.

Өргөтгөсөн худалдаанд Архангай, Дорнод, Завхан, Дундговь аймгийн малчид малын мах, цагаан идээгээр оролцож байна.

Адууны мах нэг кг нь 8000, үхрийн мах нэг кг нь 12000-13000,  хонины мах нэг кг нь 11000 төгрөгийн үнэтэй байгаа бол ааруул нэг кг нь 30-35 мянган төгрөг, өрөм 30-40 мянган төгрөг, айраг 9000, аарц 7000, шар тос 40 мянган төгрөг, шимийн архи нэг литр нь 10 мянган төгрөгийн үнээр худалдаалж байна.  “Өвлийн идэш” үзэсгэлэн худалдаа  арванхоёрдугаар сарын 21 ний өдрийг хүртэл үргэлжилнэ.