Хаврын дунд сар өчигдөр /2024.03.11/  эхлэв. Хамгийн их цас орсон өвлийг ардаа хийсэн ч эрсдэл, аюул нь арилаагүй л байна.  Хүйтний эрч суларч хөхүүрийн ам наашилж байгаа ч анхаарал сэрэмж хэзээд илүүдэхгүй. Цаг агаар дулаарахын хэрээр байшин, барилгын дээвэр дээр тогтсон  зузаан цас өдөртөө хайлж шөнөдөө мөсөн унжуурга тогтож байна. Хот суурин газарт энэ нь сэрэмжлэх ёстой аюулын нэг. Ялангуяа байшин барилгын булан тохойд тогтсон мөс дээрээс унаж хүний аминд хүрэх, эд хөрөнгө сүйтгэх явдал бишгүй гардаг. Иймд булан тохой тойрох барилгын хажуугаар явах, орж гарахдаа  дээш харж мөсөн унжуурга тогтсон эсэхийг харж сайтар сэрэмжлэх нь зүйтэй. Ингээгүйн улмаас цас их унадаг улс орнууд, Монголд амь насаа алдах,  эд хөрөнгөөр хохирох явдал яг өдийд маш их гардаг. Товчхондоо бол болзошгүй эрсдэлээс өөрийгөө болон өрөөлийг хамгаалахыг л хэлээд байгаа юм. Ялангуяа өсвөр насны хүүхдүүд чихэвч зүүж хөгжмөө чангалж явдаг учраас хүн юм хэлэх, дуудахыг сонсдоггүй. Бага насныхан бол тэр мөсөн унжуургын тогтсон зурвас мөсөн дээр гулгаж тоглох нь харагддаг.   Ийм учраас Онцгой байдлын байгууллагаас сэрэмжлүүлэг гаргаад байгаа. Тодруулбал, байгууллага, аж ахуйн нэгж, сууц өмчлөгчдийн холбоо, иргэд өөрсдийн эзэмшлийн байшин, орон сууцны барилгын дээврийн цасыг цэвэрлэж, мөс унах аюулаас урьдчилан сэргийлэх арга хэмжээ авахыг анхааруулж байна.

Үүнээс гадна өнгөрсөн өвөл цас ихтэй, хүйтэн байсан хэдий ч гол, мөрнүүдийн мөсний зузаан харилцан адилгүй байгааг Цаг уур, орчны шинжилгээний газраас удаа дараа анхааруулж ирсэн.

Гол, мөрний нийт уртын дагууд мөсний зузаан харилцан адилгүй болсон, нуурт өрх, цагаан, хар хил үүсэх, томоохон голуудын зарим хэсгээр харз, халиа, тошин гүйж мөс хэврэгших үзэгдэл ажиглагдаж байна.

Иймд хүүхдүүдээ хараа хяналтгүй орхихгүй, гол мөрний мөсөн дээр тоглуулахгүй байх нь зүйтэй юм. Мөн   цаг хожих, зам товчлох зэргээр мөсөн дээгүүр явах болон авто тээвэр хийхгүй байхыг мэргэжлийн байгууллагууд онцгойлон анхааруулж байна. 

Бас орон нутаг болон Улаанбаатар хотод  шар усны үер бууж болзошгүй нөхцөл байдал үүсээд байгаа билээ. Ялангуяа, өндөр уулсын орчим болон гуу, жалга, суваг, шуудуунд их хэмжээний цас хунгарлан хуримтлагдсан. 

Тэгэхээр  цас ихтэй уулын ам, бэл, гол, мөрний эрэг дагууд суурьшиж байгаа айл өрхүүд, аж ахуйн нэгж, байгууллага хашаа болон ойр орчмын цасаа зайлуулах, суваг, шуудууг сэргээж, үерийн усны голдирлыг өөрчлөх зэргээр  шар усны аюулаас урьдчилан сэргийлэх арга хэмжээ авахыг мэргэжлийн байгууллагууд анхааруулж байна. Ямагт анхаарал, болгоомжтой  байх нь аливаа эрсдэлээс урьдчилан сэргийлэх ач холбогдолтой билээ.

Эх сурвалж: Монголын мэдээ сонин

2024 оны гуравдугаар сарын 12. Мягмар. №022 (5940)