Баянзүрх дүүргийн 23-р хорооны нутаг дэвсгэр болох Улиастайд байшин шатаж байна гэсэн дуудлага өчигдөр 20:30 цагт НОБГ-т иржээ. 

Дуудлагын дагуу Баянзүрх дүүргийн Онцгой байдлын хэлтсийн Гал түймэр унтраах, аврах 35 дугаар ангийн алба хаагчид очиход  9х9 метрийн хэмжээтэй байшингийн дээврийн хэсэг шатаж байв. Гал түймрийн тархалтыг 20:40 цагт зогсоож, 22:10 цагт бүрэн унтраасан байна.

Нийслэлийн хэмжээнд өнгөрсөн хоногт гал түймрийн гурван дуудлага бүртгэгдэж, алба хаагчид аюулгүй байдлыг хангажээ. 
Гал түймэрт өртөж эрүүл мэнд, амь нас, өмч хөрөнгөөр хохирохоос сэргийлэн, гэр орон сууцныхаа яндан, пийшин зуухны аюулгүй ажиллагааг шалгаж, засаж сэлбэх, ашиглах боломжгүй болсон яндан зуухыг солих, түлшийг хэтрүүлэхгүй байх, угаарын хий мэдрэгчийн хэвийн ажиллагааг хангахыг НОБГ-аас онцгойлон сэрэмжлүүлж байна.