БНСУ-ын хөрөнгө оруулагч, “Ириүм” компанийн захирал, эмч Ким Бу Собын “Монгол Хьюндай” эмнэлгийг дээрэмдсэн гэх хэргийн шүүх хурал маргааш болно.  Энэ хэрэг өнгөрсөн оны намар Баянгол дүүргийн анхан шатны шүүх рүү буцсанаас хойш 4-5 удаа хойшлоод байна. Ийн олон жил, сараар шүүхийн үүд сахиж буй солонгос эмч, монголчуудад хамаг эд хөрөнгөө дээрэмдүүлсэн хөрөнгө оруулагч найдлага тасрахгүй хүлээсээр байгаа нь маш хачирхалтай. Энэ эмч хэргээ шийдвэрлэхийг хүлээх юу ч биш дэлхийн шилдэг мэс засалч энэ эмчээр эмчлүүлэх гэсэн маш олон монголчууд хохирч байгаа нь эмгэнэлтэй асуудал болоод байна. Гэтэл шүүх процесс хэдэн жил дамнан үргэлжилж, өнөө ч элдэв шалтгаан арга саам тоочин сунжирсаар байгаа юм.

Энэ хэргийг үйлдсэн Д.Мөнхбат тэргүүтэй гэр бүлийнхэн болон найз нөхөд юу хийснийг товч өгүүлье. ГССҮТ-д эрх бүхий албан тушаал хашиж явсан Д.Мөнхбат, хамт ажиллаж байсан эмч Д.Баасанжавтайгаа эмч Ким Бу Собыг залилан хөрөнгийг нь завшсан. Товчдоо хамт ажиллаж байгаад “Монгол Хьюндай” эмнэлгийг нь дээрэмдсэн гэсэн үг. Дээрэмдсэн гэдгийг шат шатны шүүх хурал батлаад түүнийг хорьсон байдаг. Ким Бусоб эмчийн эмнэлэг, хөрөнгийг Д.Мөнхбат Д.Баасанжавтай хамтран байгуулсан “Эм Би Жи Мед” ХХК-ийн хөрөнгө мэтээр бүртгэснээс эхлээд тусгай зөвшөөрөл, тоног төхөөрөмж, ажилчдын асуудал гээд луйвраа маш нарийн төлөвлөгөөтэй хийсэн байдаг. Улмаар тэд хамтдаа луйвардаж авсан тоног төхөөрөмжүүдээ банкны зээлийн барьцаанд тавин 4.9 тэрбум төгрөг зээлсэн нь ямар их хөрөнгө дээрэмдсэнийг харуулж байна.  Маш амархнаар монгол эмч нар бүхэл бүтэн эмнэлэгтэй болж, Солонгос эмч хөөгдөж туугдаж өдгөө шударга шүүх хүсэмжилж сууна.

Монгол Улсад гадны хөрөнгө оруулагчдыг хууль хүчний байгууллагатай хамтарч тонон дээрэмддэгийг Хууль зүйн сайд удаа дараа мэдэгдсэн. Гадны хөрөнгө оруулалтгүйгээр хөгжсөн улс байхгүй. Хөрөнгө оруулагчдыг хохироосон хэрэг шударга шүүхийн өмнө очих ёстойсон.