2022 оны ЭЕШ-д Орхон аймгийн 11 сурагч дөрвөн хичээлийн төрөлд 800 оноо авсан. Тэдгээр сурагчдыг өнөөдөр аймгийн удирдлагууд хүлээн авч уулзан, баяр хүргэж, батламж гардууллаа. Мөн сурлага, урлаг, спортын онцгой амжилт гаргаж, элсэлтийн ерөнхий шалгалтад 700-аас дээш оноо авсан 10 сурагчдад аймгийн Засаг даргын нэрэмжит оюутны тэтгэлэг олгож батламж гардууллаа. Засаг даргын 2020-2024 оны үйл ажиллагааны хөтөлбөр болон аймгийн боловсролын салбарт хэрэгжиж буй бодлого, хөтөлбөрүүдийн хүрээнд сурагчдыг элсэлтийн ерөнхий шалгалтад амжилттай оролцуулах чиглэлээр олон талт арга хэмжээг төлөвлөн хэрэгжүүлж байна. Тэдгээрийн заримаас дурьдхад, сурагчдаа элсэлтийн ерөнхий шалгалтад цахимаар бэлтгэх “И-лаб” хөтөлбөрийг орон нутагтаа хоёр дахь жилдээ амжилттай хэрэгжүүлж байна.

Мөн МУИС-ийн Шинжлэх Ухааны сургуультай хамтран “Эгэл арга зүйгээр хичээлийн хоцрогдлыг арилгаж багш нарыг чадавхжуулах нь” төслийг хэрэгжүүлж математик, физикийн хичээлийн элсэлтийн ерөнхий шалгалтын чанарыг дээшлүүлэх чиглэлээр багш, сурагчдын дунд олон талт үйл ажиллагааг зохион байгуулсан.

Эдгээрийн үр дүнд Орхон аймгийн 2022 оны ЭЕШ-ын дундаж оноо улсын дунджаас 22,11 оноогоор өндөр үнэлэгдэж, Орос хэлний хичээлээр улсад тэргүүлж, дөрвөн хичээлээр 11 сурагч 800 оноо авсан өндөр амжилтыг үзүүллээ гэж Засаг дарга С.Батжаргал онцлон хэлсэн. ЭЕШ-д өндөр оноо авсан сурагчдыг оюутны тэтгэлэг олгож, урамшуулах журам 2017 онд батлагдаж, зургаа дахь жилдээ олгож байгаа билээ. Өнгөрсөн хугацаанд орон нутагт эрэлттэй байгаа мэргэжлээр их дээд сургуульд элсэн суралцаж буй 60 гаруй оюутанд 700 мянган төгрөгийн тэтгэлэг олгосон байна.