Зуны 32 дахь олимп Япон улсын нийслэл Токиогийн Үндэсний шинэ цэнгэлдэх хүрээлэнд өчигдөр буюу долоодугаар сарын 23-нд албан ёсоор нээлтээ хийсэн. Олимпын наадмын нээлтийн үеэр Монгол Улсын төрийн далбаа камерын дуранд олон удаа харагдсан юм.

Ийнхүү төрийн далбаагаа намируулан зогссон иргэн “Шар айраг” хамтлагийн дуучин Г.Ганхүү байжээ. Тэрбээр энэ асуудлын талаар тайлбар хийжээ. Тодруулбал, тэрбээр “Өглөө босоод ирсэн чинь цэнгэлдэх хүрээлэнгээс хөөгдсөн гэх хэрэгт унасан байна .

Би ямар ч спортын арга хэмжээнд явахдаа төрийн далбаагаа авч явдаг уламжлалтай. Бүх улсын хөгжөөн дэмжигчид тэгдэг байх. Хөл бөмбөг үзэхээр Английг зорихдоо ч Монгол төрийн далбаагаа дэлгэдэг. Хүмүүс маш ихээр соёрхдог. Хаанаас ирсэн бэ, зургаа хамт авахуулъя гэдэг. Өчигдөр яг л тийм зүйл болсон. Хэн ч бид нарыг хөөж туугаагүй. Хэн ч тэнд орилж хашхираагүй. Хэн ч цэнгэлдэх хүрээлэнгээс хөөгдөөгүй.

Та бүхнийгээ эвгүй байдалд оруулсан бол гүнээ хүлцэл өчье, Төрийн далбаагаа эвхээд чемодандаа хийчихсэн. Ахиж гаргахгүй” гэжээ.