УИХ бол хууль тогтоох дээд байгууллага. Тэндээс гарсан хуультогтоомж, шийдвэр бүхэн жирийн иргэн бүрт хамааралтай. Тиймээс чуулганы танхимд улс орны асуудлыг цогцоор нь харж, бодлого боловсруулах сэхээтнүүд хэрэгтэй. Түүнээс зөвхөн амин хувийн бизнесээ хөгжүүлэх, ах дүүсээ өөд нь татах гэсэн аль эсвэл өстөн дайснаа намнах гэсэн хүмүүс тэнд огтхон ч хэрэггүй.

Гэтэл энэ одоогийн парламент бүх төрлийн гэмт хэрэг үүр уйрхай болсон нөхдөөр дүүчихээд байгаа. Ямар сайндаа л гурван ч гишүүнээ бүрэн эрхээс нь түдгэлзүүлчихээд байгаа билээ. Гэхдээ бүгд тийм гэж хэлж байгаа юм биш. Тэдний дунд нэр цэвэр, гар цагаан нь ч байгаа л байх. Гэхдээ олонхи нь хэцүү хүмүүс гэдгийн иргэд гадарлахтайгаа болсон.

Тиймээс бид УИХ-ын 2020 оны сонгуулиар өмнөх алдаанаасаа суралцаж ухаалаг сонголт хийх ёстой. Учир нь өмнөх нэг их дээрдэхгүй хүмүүс дахиад л нэр дэвшицгээх нь.

Улс төрийн соёл, боловсрол, хувь хүний характер гээд бүхий л талаасаа учир дутагдалтай хүмүүс намаас болон бие даан нэр дэвших нь тодорхой болоод байна. Бие биедээ өш санасан, заналхийлсан хандлагууд хэдэнтээ харагдав. Тэдгээр хүмүүс парламетад эргэн ирвэл дахиад л өнөөх ёс суртахуун гээчийг умартсан, ард түмнээ хүндэтгэдэггүй, хууль санаачлах, тогтоох бус улам самрах болно. Тэдний заримаас онцолбол:

Н.Номтойбаяр Ц.Нямдоржийг бус Г.Батхүү агсаны дүүг “намнах” гэв үү

Нямтайширын Номтойбаяр гэх эрхэм саяхан УИХ-ын гишүүний бүрэн эрхээсээ өөрийн хүсэлтээр татгалзсан гэх боловч дахиад л нэр дэвшихээр болсон. Түүнд хүн амь, авлига, танхай, хулгайн ан гээд холбогдоогүй хэрэг гэж бараг үгүй. Тэр одоо ч заримд нь шалгуулж л яваа. Хуульзүйн сайд Ц.Нямдоржтой нэгийгээ үзнэ, түүний нэр дэвших Хан-Уул дүүрэгт нэр дэвшихээ илэрхийлсэн.

Харин зарим хэвлэлээр Н.Номтойбаяр талийгаач Г.Батхүүгийн дүү П.Батчимэгийг Хан-Уулд нэр дэвшинэ гэхээр ийм шийдвэр гаргасан. Өөрөөр хэлбэл, ХУД-т нэр дэвших цаад зорилго нь талийгаачийн дүүг УИХ-д оруулахгүй унагах хэмээн бичиж байна. Тэрбээр Г.Батхүү агсаны дүүтэй ч байна уу, Ц.Нямдорж сайдтай ч байна уу ямар ч байсан тэрсэлдэхээр УИХ-д нэр дэвшиж буй бололтой.

Э.Бат-Үүлийн мөнхийн дайсан З.Энхболд

Хотын даргаар ажиллаж байхдаа гэр хорооллыг дахин төлөвлөх тендерт хүүгийнхээ компанийг шалгаруулахад оролцсон хэмээн Э.Бат-Үүлийг Авлигатай тэмцэх газар шалгаж, шүүхэд дуудсан. Мөн АН-ын нөхөр М.Энхсайханыг нь эдгээр өдрүүдэд Тавантолгойн гэрээний асуудлаар эрүүгийн хэрэгт холбогдуулан шүүж байна. Цаана нь, Да.Ганболд, Ц.Элбэгдорж гээд Э.Бат-Үүлийн найзууд хөвөрнө. Энэ бүхний бурууг Э.Бат-Үүл З.Энхболдоос хайж, түүнийг л нөлөөлсөн хэмээн ярьдаг. Тэгэхээр түүний улстөрийн “дайсан” бол З.энхболд байж таарч байна. Тиймээс тэрбрээр З.Энхболдыг УИХ-д гаргахгүй гэж үзвэл ХУД-т биш Баянзүрх дүүрэгт өрсөлдөж мэдэхээр байна.

Н.Алтанхуяг мөн л өс санасаар дахин дэвшинэ

Бие даагчдын нэр зарлагдахаас өмнө бие даан нэр дэвшихээ цахимаар зарлаж байсан ерөнхий сайд асан Н.Алтанхуяг нүүрсний хэргээр ял шийтгүүлсэн зөвлөх Л.Гансүхтэйгээ хамт нэр дэвшинэ. Одоогоор тэд аль тойрогт нэр дэвших нь тодорхойгүй. Тойрог нь тодорхойгүй ч тооцооллоо хийсээр л суугаа. Тэрбээр энэ сонгуульд өөрийг нь хонгилоор алхуулсан хүмүүстэй тооцоо бодохоо ололцон нэвтрүүлэг, ярьсан ярилцлага бүртээ хэлсээр л байгаа. Мэдээж гол бай нь Ц.Элбэгдорж ба түүний “бүлэглэл” болох болов уу.

Х.Ганхуяг С.Эрдэнийг унагахын тулд нэг тойрогт өрсөлдөнө

АН-ын хагарал тогойноосоо дэвэрсэн. Тодруулбал, намын дарга С.Эрдэнэд өстөн олширсон гэж хэлж болно. Намын залуус нь МАН-тай хамтарч С.Эрдэнэ рүү дайрч байгаа. Тодруулбал, Консул байсан Д.Мөнх-Эрдэнэ, “Хера холдинг”-ийн Х.Ганхуяг, АЗХ-ын Д.Чимэддондог нарын залуучууд сонгуулийн зардал болгож 100 сая төгрөгөө намдаа өгсөн 100 гаруй хүний нэрсийн жагсаалтыг олон нийтэд задалж нам руугаа дайрав. Мэдээж тогоо руугаа нулимж байгаа тэд ч муухай. Түүгээр зогсохгүй Д.Мөнх-Эрдэнэ намын дотоод хурлынхаа бичлэгүүдийг задалж, Д.Чимэддондог намын залуусаа шүүмжилж, Х.Ганхуяг С.Эрдэнийг УИХ-ын сонгуульд унагаахын тулд тойрогт нь өрсөлдөнө хэмээн зарлав. Үүнээс үзэхэд С.Эрдэнийн дэвших тойрогт АН-ынхан дотооддоо ширүүхэн “дайн” зарлах бололтой.