Орос-Монголын хэвлэл мэдээллийн форумыг 2026 оны арваннэгдүгээр сарын 19-ний өдөр Улаанбаатар хотноо зохион байгуулахаар Монголын сэтгүүлчдийн нэгдсэн эвлэл, ОХУ-ын Россия сегодня медиа групп тохиролцож, бэлтгэл ажлаа эхлүүллээ.

Орос-Монголын хэвлэл мэдээллийн форумд ОХУ-ын олон улсын хэвлэл мэдээллийн салбарт үйл ажиллагаа явуулдаг “Россия сегодня” медиа групп болон түүний олон улсын мэдээллийн “Sputnik”-ийн төлөөлөгчид болон бусад хэвлэл мэдээллийн байгууллагууд оролцохоор төлөвлөж байна.

“Россия сегодня” нь ОХУ-ын олон улсын мэдээллийн томоохон медиа групп бөгөөд РИА Новости, Sputnik зэрэг мэдээллийн байгууллагуудыг нэгтгэдэг. Тус групп нь олон улсын үйл явдлыг олон хэлээр сурвалжлан мэдээлэх, мультимедиа контент үйлдвэрлэх, дэлхийн хэвлэл мэдээллийн байгууллагуудтай хамтран ажиллах чиглэлээр үйл ажиллагаа явуулдаг.

“Sputnik” нь “Россия сегодня” медиа группийн олон улсын мэдээллийн агентлаг, радиогийн брэнд юм. 2014 онд байгуулагдсан тус байгууллага цахим мэдээллийн сайт, радио, мультимедиа бүтээгдэхүүн болон олон улсын сурвалжлагчдын сүлжээгээр дамжуулан дэлхийн улс орнуудын үйл явдлыг олон хэлээр хүргэдэг.

Эдгээр байгууллагын төлөөлөгчдийн оролцоо нь Орос, Монголын хэвлэл мэдээллийн байгууллагуудын харилцааг өргөжүүлэх, сэтгүүлчдийн туршлага солилцоог нэмэгдүүлэх, хамтарсан мэдээллийн бүтээгдэхүүн бүтээх боломжийг хэлэлцэхэд чухал ач холбогдолтой юм.

Урьдчилсан төлөвлөгөөгөөр ОХУ-ын хэвлэл мэдээллийн байгууллагуудаас 20, Монголын талаас 45 төлөөлөгч, сэтгүүлч, хэвлэл мэдээллийн салбарын төлөөлөл хуран цуглахаар байна.