Ойрын өдрүүдэд Монголын ард түмэн сонгууль, сонголтоор амьсгалж байна. Эхнийх нь Монгол Улсын тав дахь Ерөнхийлөгчөөрөө хэн гэдэг эрхэмийг сонгох вэ гэдэг түүхэн сонголт буюу улс төрийн сонгуульд Монгол Улсын иргэн бүр оролцоно. Харин нөгөө нь энэ жил 12 дугаар ангиа төгсч, алдрай насаа үдэн амьдрал хэмээх их далайд хөл тавьж буй охид хөвгүүдийнхээ мэргэжлийг сонгох их ажил яг энэ цаг үед өрнөж байгаа.

Сонгуулиас ч дутахааргүй ач холбогдолтой мэргэжил сонголтын тухай яриа  төгсөх ангийн хүүхэдтэй айл болгоны гал тогооны халуун сэдэв болж буй. Төгсөөд ажлын байр хэр олдоцтой вэ, тэтгэлэгт хамрагдаж болох уу гэх мэтээр орчин үеийн залуус илүү бодитой, амьдралд ойр асуултууд тавьж, сонгосон мэргэжлээ нухацтай судлан аав ээж, багштайгаа зөвлөж шийддэг болжээ. Ажиглаад байхад, хот хөдөөгүй хамгийн эрэлттэй, хэзээд хүний нөөц нь дүүрдэггүй мэргэжил бол багш юм байна.

Хаана ч очсон ажлын байртайгаа, бас ч гэж цалин хангамж сайтай, нийгмийн асуудлуудыг нь шийдвэрлэхийн тулд төрийн болон төрийн бус байгууллагуудын олон төсөл, хөтөлбөр хэрэгждэг боломжийн салбар учраас тэр биз. Хамгийн гол нь нэгэнт сонгосон мэргэжлээ сайн сургуульд чанартай эзэмшвэл зорилгоо биелүүлж, мөрөөдөлдөө хүрэх эхний алхамаа хийж буй нь тэр. МУБИС яг энэ шалгуурт тэнцэнэ гэдэгтэй маргах хүн цөөн биз.

“Хүүхэд бүрийг хөгжүүлэх чадамжтай бүтээлч багш бэлтгэнэ” уриатайгаар сургалтын хөтөлбөрөө боловсруулж, хүмүүжлийн ажлаа зохион байгуулдаг тус сургуулийн удирдлага, хамт олны санаачлан хийж буй ажил олон. Үүн дээр нэмээд залуусын хамгийн түрүүнд тавьдаг асуултуудын нэг болох “Тэтгэлэгтэй болов уу” гэдэг асуултад “Тийм” гэж хариулъя.

Тэгэхдээ бүр “ёоз ёозоороо” гэдэг шиг янз бүрийн тэтгэлэгт хөтөлбөрийг зарлаж, оюутнуудынхаа магнайг тэнийлгэдэг юм байна. Тухайлбал, ирэх намраас буюу 2017-2018 оны хичээлийн жилд Монгол Улсын Засгийн газрын 70, 100 хувийн тэтгэлэгт хөтөлбөр, МУБИС-ийн захирлын нэрэмжит 50 хувийн тэтгэлэгт хөтөлбөр, эрэгтэй оюутны 50 хувийн тэтгэлэгт хөтөлбөр, үүнээс гадна кредитийн олон хөтөлбөрүүд бий юм байна шүү, залуус аа.

Мөн “Голомт” болон ХААН банк, Зориг сан, Оюутолгой, “Дэлхийн зөн” олон улсын байгууллага, Өмнөговь аймгийн нэрэмжит болон аймгуудын ЗДТГ, ИТХ-ын нэрэмжит тэтгэлгүүд байдаг юм байна. Эндээс л олдвол алдаж болохгүй боломж, багш болоход алзахааргүй мэргэжил гэдэг нь харагдаж байгаа юм. Өнөөдөр олон гэр бүл оюутан хүүхдийнхээ сургалтын төлбөрийг хийхийн тулд цалин, тэтгэврээ зээл хэлбэрээр авч, түүнийхээ хүүнд дарлуулж суугаа нь нууц биш.

Харин залуус дүү нар минь жаахан хичээхэд л сургалтын төлбөрөө тэтгэлгээр шийдэн өрхийн төсөвтөө учруулж буй дарамтаас чөлөөлөгдөж аав ээжийнхээ сэтгэлийг тэнийлгэж яагаад болохгүй гэж. Нарт хорвоод байхгүй нандин сайхан албанд очих хүнээрээ танай гэр бүл лав бахархана. Гэхдээ “эзэн хичээвэл заяа хичээнэ” гэдгийг мартаж болохгүй. Багш болохын тулд бас тодорхой шалгуурууд бий шүү. Хамгийн эхнийх нь чин сэтгэлээсээ хүүхдэд хайртай, энэ мэргэжилд үнэн голоосоо дуртай байх хэрэгтэй.

Тэгээд элсэлтийн шалгалтын оноо чухал. 2017-2018 оны хичээлийн жилд МУБИС-д математик, байгалийн ухаан, урлагийн багш болохоор элсч буй оюутнууд доод тал нь 600 оноо авах учиртай юм байна. Харин бага ангийн багш болон сургуулийн өмнөх боловсролын хөтөлбөрөөр суралцах оюутнууд 550-аас дээш оноотой байх ёстой.

Хэрэв та элсэлтийн шалгалтандаа 751-ээс дээш оноо авч чадвал дөрвөн жилийн турш сургалтын төлбөрийн 100 хувийн тэтгэлэгт хамрагдах болзлыг хангана. Харин 650-750 оноотой бол 70 хувийн тэтгэлэгт хөтөлбөрт дөрвөн жилийн турш хамрагдах эрхтэй. Үүнээс гадна багшлах дадлагаа 300-500 мянган төгрөгийн цалинт тэтгэлэгтэй хийнэ гээд бод доо. 

Харин өдгөө хамгийн дээд оноотой хүүхдүүд тус сургуулийг сонгож байгаа нь сургуулийн олон сайхан болзлыг харсных ч байх, ажлын байр олонтойг ч харгалзсан хэрэг байх. Юутай ч Д.Мөнхжаргал ректор багшийн нэр хүндийг өсгөх, тэгснээр ирээдүйгээ зөв бэлтгэх их үйлсэд чухал хувь нэмэр оруулж яваа аж. МУБИС үнэд орох цагаар...