Монгол Улсын Ерөнхийлөгч Ц.Элбэгдоржийн хоёр дахь бүрэн эрхийн хугацаа дуусч буйтай холбоотойгоор дараагийн Ерөнхийлөгчийг тодруулах бүх нийтийн сонгууль энэ сарын 26-нд болсон. Сонгуульд эрх баригч МАН-аас УИХ-ын дарга М.Энхболд, сөрөг хүчин АН-аас Үйлдвэр хөдөө аж ахуйн сайд асан Х.Баттулга, МАХН-аас УИХ-ын гишүүн асан С.Ганбаатар нар нэр дэвшин өрсөлдсөн. Гэвч, нэр дэвшигчдийн хэн нь ч сонгогчдын талаас илүү хувийн санал авч чадаагүй учраас манай улсад түүхэндээ анх удаагаа шийдвэрлэх шатны санал хураалт явуулахаар болсон билээ. Хоёр дахь санал хураалтад МАН болон АН-ы нэр дэвшигч өрсөлдөх юм. СЕХ-ноос өмнө нь шийдвэрлэх шатны санал хураалтыг долдугаар сарын 9-нд товлосон ч, улс төрийн нам, холбоо, эвсэлүүд эсэргүүцэн хугацааг урагшлуулахыг шаардсан байдаг. Тэгвэл тус шаардлагыг СЕХ хэлэлцээд ирэх сарын 7-нд явуулахаар болсон байна. Энэ талаар СЕХ  хэвлэлийн хурал зарлан олон нийтэд мэдээллээ.  

Хоёр дахь шатны санал хураалттай холбоотойгоор УИХ-ын гишүүн О.Баасанхүү санал хураалтыг долдугаар сарын 4-нд, АН, Ардчилсан залуучуудын холбоо товыг урагшуулж, долдугаар сарын 6-ны өдөр явуулахыг шаардсан байдаг. Тэгвэл тэдгээр шаардлагыг СЕХ хэлэлцэн судлан үзсэний үндсэн дээр урагшлуулж, долдугаар сарын 7-нд явуулахаар товложээ.

Учир нь санал хуудас хэвлэх, хөдөө орон нутагт хүргэх, тоног төхөөрөмжөө бэлтгэхэд хугацаа шаардлагатай учраас хамгийн боломжит хувилбараар хугацааг товлосон гэдгээ СЕХ-ны дарга Ч.Содномцэрэн онцолсон юм.

Түүнчлэн, гадаад  улс оронд ажиллаж амьдарч буй монголчуудад саналын хуудсыг хүргэхэд оногдсон хугацаа хүрэлцэхгүйтэй холбоотойгоор санал хураалтыг долдугаар сарын 4-5-нд явуулахаар болжээ.