Улсын хэмжээнд 2017 оны зургадугаар сарын 14-ний өдрийн байдлаар Улаанбаатар хотод 16 удаа, Архангай, Баян-Өлгий, Булган, Дорнод, Завхан, Сүхбаатар, Сэлэнгэ, Төв, Ховд, Хөвсгөл, Хэнтий зэрэг 11 аймгийн 49 суманд 79 удаа нийт 95 удаагийн ой, хээрийн гал түймэр гарч /урьдчилсан байдлаар/ 38821.3 га ой, 27687 га хээр, нийт 66508,3 га талбай түймэрт өртөж шатсан гэх харамсалтай мэдээ гарчээ.

 Энэ оны эхний зургаан сард гарсан ой, хээрийн түймрийг өнгөрсөн оны мөн үетэй харьцуулахад түймрийн тоо 17.5 хувиар өссөн. Цаг уурын байгууллагаас гаргасан цаг агаарын урьдчилсан мэдээгээр нийт нутгаар зургадугаар сард хуурайшилт нэмэгдэж ой, хээрийн гал түймрийн эрсдэл ихсэх хандлагатай байгаа Шадар сайд холбогдох албаныханд мэдэгдэл хүргүүлжээ.

Тухайлбал, БОАЖ-ын сайд Д.Оюунхоролд цаг агаарын мэдээлэл, сансрын хиймэл дагуулын мэдээгээр авсан ой, хээрийн гал түймрийн голомт, тархалтын зураг, хуурайшилтын мэдээг шуурхай боловсруулан Онцгой байдлын ерөнхий газарт хүргүүлж байгаа ажлыг баяр амралтын өдрүүдийг харгалзахгүй шуурхай зохион байгуулах, Цаг агаарт зориудаар нөлөөлөх үйл ажиллагааг боломжтой нөхцөл байдалд хэрэгжүүлэхийг үүрэг болгосон аж.

Харин аймаг нийслэлийн Засаг дарга, аймгийн Онцгой комиссын дарга нарт түймрийн эрсдэл ихтэй бүс нутгуудад хөдөлгөөнт эргүүл, хяналт шалгалтын цэг ажиллуулах, урамшуулалт морин эргүүлийг зохион байгуулах мөн түймэр унтраах ажилд дайчлагдан ажиллаж байгаа алба хаагчдад шаардлагатай хангалтын ажлыг шуурхай зохион байгуулах /багаж хэрэгсэл, шатах тослох материал, хоол хүнс, эмнэлгийн үйлчилгээ г.м/ үүргийг тус тус өгсөн байна. Гуравдугаарт, Онцгой байдлын ерөнхий газрын дарга, Бригадын генерал Т.Бадрал, ЦЕГ-ын дарга, Цагдаагийн хуралдаа Ө.Энхтөр нарт ч үүрэг өгч, шуурхай ажиллахыг сануулжээ.