“Цэвэрлэгээндээ гараарай. Анхаараарай, ганц хүрз шороо даахгүй хүүхэд, хөгшчүүдээ гаргачихаад өөрсдөө амарч байгаа хүмүүс болиорой. 20 дугаар байрны Балбар гэж нөхөр бүртгүүлчихээд гэртээ орчихсон байна шүү” хэмээн цагаан хоолой барин хашгичих шахам ярих эрхмийн дүр “Би чамд хайртай” кинонд мөнхрөн үлдсэн байдаг. Тэр үеийн нийгэм ийм л байсан. Иргэд нь цэвэрлэгээндээ идэвхитэй оролцож, ойр орчмынхоо хогийг хамтдаа цэвэрлэж,  хотоо гоёдог байжээ. Харин одоо цаг өөр болж.

Бүх нийтийн цэвэрлэгээний өдөр зарладаг ч, түүнд нь оролцдог хүн тун цөөн. Магадгүй дийлэнх нь цэвэрлэгээ бол зөвхөн СӨХ-ийн, ТҮК-ийн  ажилчдын хийх ажил гэж ойлгодог байх.

Тэднийг социализмын үе шиг “Цэвэрлэгээндээ гараарай” гэж шахаж шаарддаг ч хүн алга. Магадгүй шаардвал хэрүүл тэмцэл болохыг ч үгүйсгэхгүй.

Гэвч, гэр хороололд ч,  орон сууцанд  ч бай нийслэлийн нутаг дэвсгэрт амьдарч буй бүх хүн нэг  агаараар амьсгалдаг билээ.  Тиймээс л хотоо, амьдрах орчноо гоё болгоход социализмын үе шиг иргэн нэг бүрийн оролцоо чухал байгааг сануулах гэсэн юм.

Өнгөрсөн сард Францын нийслэл Парис хотын захирагч Анн Идалго хотынхоо өнгө үзэмжийг сайжруулах мастер төлөвлөгөө боловсруулж, түүндээ 1.5 сая евро төсөвлөсөн байдаг. Түүний төлөвлөгөөнд цэвэрлэгээний ажилчид болон эрүүл ахуйн байцаагчдын тоог нэмэгдүүлж, хог хаягдал ачих хугацааг уртасгах, бүх байгууллага гаднаа хогийн савтай байх зэрэг санаачилгыг тусгасан байсан юм. Улмаар иргэддээ төлөвлөгөөгөө танилцуулахдаа, “Хотоо цэвэр цэмцгэр байлгах нь иргэн нэг бүрийн үүрэг” хэмээж сэтгэлгээ, зуршлаа өөрчлөхийг уриалсан байдаг.  Бидний хувьд ч зуршил, сэтгэлгээгээ өөрчлөх үе иржээ.

Японы Токио хот 13 сая хүн амтай ч, гудамж нь маш цэвэрхэн. Иргэд нь гудамжинд хог хаяхгүй, хог гарсан ч түүнийгээ халааслаад гэртээ аваачиж хаядаг соёлын сэтгэлгээний онцлогтой хүмүүс. Тиймдээ ч, гудамжинд нь хогийн сав тэр бүр байдаггүй гэнэ билээ. Гэтэл Улаанбаатар хот сая гаруй хүн амтай, хог нь овоорчихсон, цэвэрлэх сэтгэлтэй хүн цөөхөн байгаа нь л асуудал болж байна. Урин дулаан цаг ч ирлээ. Нийслэлийн хороо, хэсгийн ахлагч нар иргэдээ уриалаад аль нэг амралтын өдрөөр бүх нийтийн цэвэрлэгээ хийвэл ямар вэ.  Гэхдээ  өрх бүрээс нэг төлөөлөл байлцуулж, өөрсдийн амьдрах орчноо  цэвэрлэн хотоо гоёцгооё.  Хот тохижилтын газраас хотын зам талбайгаа угаагаад эхэлсэн. Гэсэн ч, хотын өнгө үзэмж гэдэг зөвхөн зам талбайгаас шалтгаалахгүй. Нийслэлд хамаарч буй бүх нутаг дэвсгэр Улаанбаатарын өнгө үзэмжтэй шууд холбоотой билээ.  Тиймээс иргэдээ цэвэрлэгээнд уриалж, өөрсдийн амьдрах орчноо гоё болгоцгооё. Харин  ганц хүрз хог даахгүй, гэртээ хэвтэх хэнэггүй нэгнийг торгосон ч яадаг юм.