БНХАУ-ын Засгийн газрын хөнгөлөлттэй зээлийн хөрөнгөөр Хан-Уул дүүргийн дөрөвдүгээр хорооны нутаг дэвсгэрт хэрэгжих Яармагийн шинэ гүүр барих, хуучин гүүрийг завсарлах төслийн нээлт яг одоо болж байна.

Уг төсөл нь маш олон жил яригдсан бөгөөд “Гудамж” төслийн хүрээнд хийгдэх тухай яригдсан ч Хятад улсын хөрөнгө оруулалтаар хийгдэхээр яриа хэлцэл явж байсан учраас хойшлуулсаар өнөөдрийг хүрсэн юм.

Тэгвэл энэхүү ажил хуулийн хүрээнд албан ёсоор эхэлж, өнөөдрөөс зам гүүр барих компаниуд ажилдаа гарч байгаа аж.  Өнгөрөгч долоо хоногт гүүр барих ажлын бэлтгэл ажил бүрэн хийгдэж, гүүр барих технологийн дагуу орчны мод бургасыг чөлөөлөх газар шорооны ажил бүрэн хийгдэж дууссан юм. Нийслэлийн Хан-Уул дүүрэгт сүүлийн жилүүдэд барилга орон сууц ихээр баригдаж буй.

Тэр тусмаа төрийн санхүүжилтээр баригдсан “Шинэ Яармаг”, “Буянт-Ухаа-1, 2” хорооллууд ашиглалтад орж, Яармаг чиглэлийн замын ачаалал хоёр дахин нэмэгдсэн учраас гүүрэн гарц, зорчих чиглэлийн зам уулзварыг өргөтгөх зайлшгүй шаардлага тулгарсан гэдгийг салбар яамнаас мэдээллэж буй юм. Зам гүүрийн ажлыг хоёр жилийн хугацаанд хийж гүйцэтгэхээр болсон байна.

БНХАУ-аас ажилчид ирж, Яармагийн хуучин гүүрний завсрын, даацын тулгуур баганыг засах, ховхорсон бетон хучилтыг нөхөх, гүүрийг шинээр хучих ажил хийхээс гадна явган хүний зам, хашлага, гэрэлтүүлгийг сольж, голын даланг сайжруулахаар болжээ. Мөн бүтээн байгуулалт дууссаны дараа ногоон байгууламжтай болгож, газрыг нөхөн сэргээхээр болжээ.