Физикийн олимпиадаас хоёр медальтай ирлээ

Физикийн олимпиадаас хоёр медальтай ирлээ

Израйль Улсын Тель-Авив хотноо болсон Олон улсын Физикийн 50 дахь олимпиад (IPhO-2019)-д энэ жил 78 орны 364 хүүхэд, 150 гаруй дасгалжуулагч багш оролцож манай сурагчдын хоёр нь медальтай, нэг тусгай байрын шагналтай иржээ. Монгол Улсын физикийн олимпиадуудын дүнг нэгтгэн шалгарсан эхний таван сурагч уг олон улсын тэмцээнд явжээ. Тодруулбал, Сант сургуулийн 12 дугаар ангийн сурагч Д.Итгэл, Монгол-Оросын хамтарсан гуравдугаар сургуулийн сурагч Д.Хонгор нар хүрэл медаль, нийслэлийн нэгдүгээр сургуулийн 11 дүгээр ангийн сурагч Б.Цолмон тусгай байрын шагнал тус тус хүртэж, Сант сургуулийн 12 дугаар ангийн сурагч С.Бат-Оргил, нийслэлийн 11 дүгээр сургуулийн 12 дугаар ангийн сурагч С.Сайханбилэг нар амжилтаа ахиулан ирсэн юм. Улсын Физикийн олимпиадын хорооны дарга М.Ганбат “Олимпиадын бодлогын тавил, үнэлгээнд өнгөрсөн жилээс их өөрчлөлт орсон байна. Бидний ерөнхий боловсролын хөтөлбөр, сургалтад хэрэгжүүлэхийг хүсэж байгаа шинжлэх ухаанч эрэл хайлт, танин мэдэхүйн дээд түвшинд хийх даалгаврууд ирсэн. Туршилтын онолыг өөрөө боловсруулж, өөрөө төлөвлөх, өндөр нарийвчлалтай гүйцэтгэх, мета үйл ажиллагаа шаардсан, маш өндөр шалгууртай даалгавар ирсэн. Израилийн Боловсролын яамны STEAM боловсролын хөгжлийн газар их сургуультайгаа хамтарч уг олимпиадыг зохион явуулсан нь дэлхийн хөгжлийн хурдыг харууллаа” гэлээ. Манай улс сүүлийн 20 орчим жил олон улсын Физикийн олимпиадад оролцож байгаа бөгөөд энэ удаад МУИС-ийн багш, доктор Г.Мөнхбаяр, зөвлөх багш М.Ганбат, МУИС-ийн БУС –ийн дэд захирал, доктор Ц.Амартайван нарын ахлагчтай таван сурагч оролцсон юм.

ХОЛБООТОЙ МЭДЭЭ
МЭДЭЭНИЙ СЭТГЭГДЭЛ

АНХААРУУЛГА:Уншигчдын бичсэн сэтгэгдэлд mminfo.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 99998796 утсаар хүлээн авна.