МАН-ын Засгийн газар ажлаа авсныхаа дараахан төрийн албаныхны тансаглалыг танана хэмээн мэдэгдсэн ч Монголын хууль гурав хоног гэгч болсон. Үнэхээр таг болсон доо. Гэтэл Ерөнхий сайд Ж.Эрдэнэбат овоо дахин сөхлөө. Тэрбээр өчигдөр төрийн захиргааны төв болон захиргааны байгууллага, төрийн өмчит улсын үйлдвэрийн газрын удирдлагуудтай уулзаж, үүрэг даалгавар өгчээ. Энэ үеэрээ ард түмэн биш Монголын төр “бүсээ чангалах” ёстой хэмээн хэллээ. Манай улс ОУВС-гийн “Санхүүгийн өргөтгөсөн хөтөлбөрт” хамрагдаж, эдийн засгаа аврахаар тэмцэж байгаа. Энэ хөтөлбөрт хамрагдахын тулд Монгол Улс төсвөө сахилга баттай болгох хэрэгтэй.

 

Хэтэрхий үрэлгэн зарлага гаргахгүй, элдэв халамжаа танаж, төсвийн орлогоо нэмэгдүүлэхийг ОУВС-гаас шаардсан нь тодорхой. Энэ хүрээнд Засгийн газар төсвийн зарлагаа бууруулахын тулд хүн амын өсөлтийг дэмжсэн ганц үр дүнтэй бодлого болох хүүхдийн мөнгөө хасах шинжтэй. Дээрээс нь 6-7 төрлийн татвар нэмнэ гэдгээ мэдэгдсэн. Үүнээс үүдээд төрийн томчууд өөрсдөө тансаглалаа танаагүй байж, иргэдийн халаас руу гар дүрлээ хэмээн зад шүүмжлүүлж буй.

Хэвлэлийнхэн ч үүнийг сануулсаар байгаа. Ерөнхий сайд “Хэрвээ та мөнгө хийх гэж байгаа бол төрд биш, бизнесийн салбарт зүтгэ. Тийм хүмүүс одооноос эхлээд Төрийн ордноор, яамдын байраар эргэлдэх хэрэггүй. Төрийн албанд өнөөдрөөс эхлээд боловсрол, мэргэжлийн дипломоос гадна чадвар, сэтгэл, ёс зүйг эрхэмд тооц. Төрийн мөнгөөр шинэ тавилга, унаа машин авахгүй ээ. Хэрвээ тавилга нь гологдож, албаны унаа нь тухгүй санагдаж байвал тэр хүн өөрөө ажилдаа гологдож байна гэж ойлго.

 

Тэнд таныг хувийн бизнесээ хийгээд илүү тансаг өрөөнд ажиллах таатай орчныг бүрдүүлэхийн төлөө бид харин энд зүтгэе. Маргаашаас эхлээд, төрийн томилолтоор гадаадад болон дотоодод онгоцоор зорчих хүмүүс энгийн суудалд, хамгийн хямд тийзээр зорч. Татвар төлөгчдийн хөрөнгөөр, ердийн тийзнээс  2-6 дахин өндөр үнэ төлж бизнес ангилалд ту­халж явдаг төрийнхний тан­саг­лалыг  өнөөдрөөс тасал­бар болго. Үүнд Засгийн газ­рын Хэрэг эрхлэх газрын дарга Ж.Мөнхбат та хяналт тавьж ажилла. Хэрвээ тэр хүн заа­вал нэг­дүгээр зэрэглэлийн суу­далд сууж явмаар байгаа бол үнэ, тарифын зөрүүг нь өөрөө, хувиасаа  төлөөд яв.

 

Төрийн болон төрийн өмчийн орол­цоо­той аж ахуйн нэгжийн захир­лууд байгууллагаа ашигтай ажил­луулж чадахгүй бол чаддаг хүнд нь ажлаа өгөөрэй. Засгийн газар бай­гуу­лагд­саны­хаа дараахан төрийн болон төрийн өмчийн оролцоотой аж ахуйн нэгжүүдийн захирлуудын ца­лин, урамшууллыг 30-60 хувь буу­руул­сан. Одоо бусад хан­гамж, илүүдэл зардалд болом­жит хэмнэлт, таналт хийж, Засгийн газрын хурал­даанд танил­цуу­лахыг  Төрийн өм­чийн бодлого, зохицуулалтын газ­рын даргад үүрэг болгож бай­на” хэмээн зоригтой дуугараад авлаа. Болж байна аа, эрхбиш засгийн тэргүүн байна даа.

 

Тэгэхгүй бол өнгөрсөн намаржин, өвөлжин дарга нар сандал, ширээгээ сольсон. Хэчнээн тэрбумаар нь мөнгө үрсэнийг хэн мэдлээ. Одоо болтол дарга нар, УИХ-ын гишүүд хуралдаа ч суухгүй гадаад руу зугаалж байна. Ядаж байхад дарга сэтэртнүүд эхнэр, хүүхдээ аваад зугаална. Бас нэг хэлэхгүй өнгөрч боломгүй зүйл бол нөгөө л дарганцарууд төрийн машинаар авгайгаа шопиндуулж, хүүхдээ зөөлгөдөг явдлыг зогсоох хэрэгтэй. Улс орноо бодоод тэр нөхөд өөрс­дөө ухамсарлаад болих байлгүй дээ. Энэ мэтийг ч Засгийн газрын тэргүүн бусад дарга нараас шаардмаар байна. Шаардах ч байх.

 

Эхнээсээ шаардаж эхэллээ. Одоо гол нь сайн хянаж, зөрчвөл хариуцлага тооцох хэрэгтэй. Хэвлэлийнхэн ч энэ тал дээр ёстой дурандаад өгье. Ер нь бол дэд сайд нарыг ч гэсэн халах хэрэгтэй шүү дээ. Хэмнэлтийг Монголын төр бодитоор хийх цаг болсон. Саяхан “дүүриймааддаг-”ийг хориглосон байна лээ. Үүнийг зарим нэгэн шоолон хүлээж авч байгаа ч үнэндээ ингэхгүй бол долдой нар  хадаг яндар, аяга сүү, архи дарс, хорхог мах гээд сүжирдэг нь үнэн л дээ. Үүнийг бага гэж чамлах хэрэггүй юм аа.