БНХАУ-ын Үндэсний хүн ам 2016 оны жилийн эцсийн тооллогоор 1.38 тэрбум гэж тоологджээ. Гэхдээ хүн амд эзлэх эрэгтэйчүүдийн тоо эмэгтэйчүүдийнхээс даруй 33 саяар их байна гэсэн тооцоо гарсан байна.

Тодруулбал, 1.38 тэрбум хүн амтай Хятад улсад нийтдээ 708.15 сая эрэгтэй амьдардаг бол эсрэгээр эмэгтэйчүүдийнх нь тоо  674.56 сая байжээ. Хамгийн сонирхолтой нь тэдгээр эрэгтэйчүүд болон эмэгтэйчүүдийн хүн амд эзлэх зөрүү нь бүхэл бүтэн Малайзын нийт хүн амын тоог давж байх жишээтэй. Харин манай улсын нийт хүн амыг 10 дахин үржүүлсэнтэй тэнцэх хэмжээний зөрүү гарч байгаа юм.

Тус улсад олон жилийн турш хэрэгжүүлсэн хүн амаа цөөлөх  “Нэг өрх-Нэг хүүхэд” бодлогын улмаас гэр бүлүүд ихэвчлэн удам залгах эрэгтэй хүүхэд төрүүлэхийг эрмэлзэж, тэр ч үүднээс эдүгээ эрэгтэй, эмэгтэйчүүдийнх нь хүн амд эзлэх хувьд асар их зөрүү гарах болжээ. Улмаар эхнэр авна гэдэг хятад эрчүүд ялангуяа хөдөөгийн тосгодын эрчүүдийн  хувьд том асуудал болдог бөгөөд хөрш зэргэлдээ Вьетнам зэрэг улсаас эмэгтэйчүүд хулгайлах, худалдаж авах явдал их байдаг байна.