Америкийн кино урлагийн академи 89 дэх удаагийн “Оскар”-ын наадамд нэр дэвшигчдийг зарлалаа. Улмаар шоу бизнесийн ертөнцийн талаар өгүүлсэн найруулагч Дэмьен Шазелийн “Ла Ла Ланд” мюзикл кино хамгийн их буюу нийт 14 номинацид нэр дэвшчээ.

Холливудын алтан үеийн тухай тус бүтээл шилдэг кино, шилдэг найруулагч, гол дүрийн эрэгтэй, эмэгтэй жүжигчин гээд нийтдээ 14 төрөлд нэр дэвшсэн байна. Өмнө нь 1950 онд “All About Eve”, 1997 онд “Titanic” зэрэг кино л Оскарын түүхэнд хамгийн их буюу 14 номинацид нэр дэвшиж байжээ.

Мөн энэ удаагийн Оскарт зургаан өнгөт арьст жүжигчин нэр дэвшиж буйгаараа ч онцлог болох гэнэ. Тодруулбал, Махершала Али, Наоми Харрис нар “Moonlight” киногоороо шилдэг туслах дүрийн эрэгтэй, эмэгтэй номинацид нэр дэвшээд буй гэнэ. Өнгөрсөн хоёр жилд өнгөт арьст жүжигчин болон найруулагч Оскарт нэр дэвшээгүй бөгөөд үүний улмаас арьс өнгөөр ялгаварлан гадуурхах үзэл тус наадамд ч гарч буйг сошиал медиа хэрэглэгчид ихээхэн шүүмжилж байсан юм.

Оскарын шагнал гардуулах ёслол ирэх сарын 26-нд болно.