Эрүүл мэндийн сайд А.Цогцэцэг сурагчдын амралтыг сунгах, олон нийтийн арга хэмжээг зохион байгуулахгүй байх асуудлаар нийслэлийн Засаг дарга бөгөөд Улаанбаатар хотын Захирагч С.Батболдод хандан албан тоот  хүргүүлсэн.  Ажлаа авснаас хойш олигтой ганц ч үг дуугаараагүй эрхэм сайдын оюун ухаан гэнэт гэрэлтэн саруулсаж, маш зөв санал санаачилгыг гаргаж, хотын даргад хүргүүллээ. Харин хотын дарга албан тоотынх нь хариуг өнөөдөр өгч, хийж хэрэгжүүлж байгаа ажлаа танилцуулсан байсан. За тэр ч яахав,

Харин БСШУС-ын яамнаас  ерөнхий боловсролын сургуулийн сурагчдын өвлийн амралт энэ  сарын 19-ний өдөр хүртэл үргэлжлэх тул амралтыг сунгах асуудлыг түр хойшлуулах тухай мэдэгдсэн бөгөөд халдварын тархалт цаг үеийн байдалтай уялдуулан амралт дуусахын өмнө дахин зөвшилцөн шийдвэрлэхээр болсон байсан. Энэ асуудлыг л жаахан ойлгож ядаад байна. Юуг нь зөвшилцах гээд байгаа юм, бүү мэд. Нэгдүгээр сарыг дуустал ядаж 1-5 дугаар анги хүртэл багачуулаа амраачихад юу өөрчлөгдөх юм. Юу ч өөрчлөгдөхгүй, зургадугаар сард жаахан сунгаад л хичээллэчихгүй юу. Эсвэл хаврын амралтынх нь хугацааг жаахан багасгачихаач дээ.

Өнөөдөр Улаанбаатар хотод утаа ямар хэмжээнд хүрээд байгаа билээ. Тэгээд дээрээс нь гуна, дөнөн үхрийн эвэр хуга хөлддөг гурав, дөрвөн есийн хүйтэн эхэлчихлээ. Хөхөө өвлийн хүйтэнд утаа униар улам нэмэгдэж, ханиад томууны вирус илүү идэвхжинэ үү л гэхээс багасахгүй шүү дээ.

19-ний өдрөөс хойш сайхан дулаараад, нийслэлийн утаа багасаад, ханиадны дэгдэлт намдаад, эмнэлгийн ачаалал буурна гэж байх уу. Ёстой тийм байхгүй шүү.  Нэгдүгээр сар хүртэл улам л хүйтэрнэ. Харин хоёрдугаар сарын эхнээс жаахан уриншиж магадгүй. Хаврын урь дөхөх учраас. Тиймээс багачуудыг энэ сар дуустал гэрт нь байлгачихаач дээ, энэ чинь. Гадаа гарч утаа амьсгалахгүй, ханиад хүрэхгүй амар шүү дээ.

За тэр хөдөө орон нутгийн сургуулиуд нь хичээллэдэгээрээ хичээллэнэ биз. Улаанбаатар хотод бол ер нь нэгдүгээр сардаа бага ангийн сурагчдыг амраачихдаг л байх хэрэгтэй байна. Нийслэл утаанаасаа салаад, ханиад томууны дэгдэлт нь багастал бас ч гэж зай ч байна лай ч байгаа. Өнөөдөр утаанаас бол бага насны хүүхдүүд ханиад хүрээд, ядаж байхад хүйтэнд уушигны хатгаа тусах нь ихэсчихлээ.

Тэгээд дээрээс нь хүндэрч, уг руугаа орохдоо хурдан байна. Өрхийн эмнэлэг дээр хүүхэд хатгаа авсан эсэхийг ч мэдэхгүй эмч нэртэй “сүг”-нүүд сууж байгаа. Өрхийн эмнэлэгт ажиллаж, хүний эрүүл мэндээр тоглож дадлагажих гэж яваа л хүмүүс шүү дээ. За тэгээд дүүргийн эмнэлэг дээр очихоор нэг муу юм оношлоод, мэднэ. Гэтэл хэвтэх ор алга. Хатгалгаа нь хүндрээд, зогсоо зайгүй ханиалгаж, 38 давж, 39 өнгөрч, 40 хүрч халуурч байгаа хүүхдүүд эмнэлгийн хонгилд хэвтэх дээрээ тулж байна.

Ядаж байхад эмнэлгийн төсөв гэж алга. Эм тариа дутмаг. Эмч нарынх нь ааш зан гэж авах юм байхгүй. Хүн үхэж байсан ч тоохоо больчихсон. Аргаа барсан иргэд хувийн эмнэлэгт хэвтэх болдог. Гэтэл нэг хоногийн 50, 60 мянган төгрөгийн төлбөртэй эмнэлэгт 7 хоног хэвтээд, хүүхдийнхээ өвчнийг эдгээгээд гарах хүн хэд билээ.

Хэцүү л байна шүү дээ, яг үнэн дээ. Ийм байхад ид хүйтний үеэр бага ангийн хүүхдүүдийг сар амраалаа гээд хэнээс юу унах гээд байгаа юм бэ. Дулаан гэртээ суугаад, ханиад хүрэхгүй байвал сүйрчихсэн эрүүл мэндийн салбарт чинь ачаа нэмэхгүй амар юм биш үү. Жилд бага насны хүүхдүүд хэдэн зуугаараа уушигны хатгалгаанаас болж амиа алдаж байхад 7 хоног амралт сунгах ёстой лай л байна.

Зөвшилцөнө барина гэж худлаа сүржигнэж, ажил хийсэн болж харагдах гэж байхаар зүгээр л амралтыг нь сунгачихаач дээ, мэддэг хүмүүс нь. Өмнө нь сар амарч болоод л байсан, одоо л болохоо больчихов гэж. Өмнөх хүмүүсээс өөрөөр ажиллаж байвал юу ч хийсэн хамаагүй гэж боддог бол арай л биш шүү.