Ардчилсан намын Ерөнхий нарийн бичгийн дарга Л.Эрхэмбаяр, АН-ын даргын сонгуулийн хорооны дарга Ж.Оюунбаатар нар дөнгөж сая мэдээлэл хийлээ. Энэ үеэрээ АН-ын даргын сонгууль хэзээ эхлэх, ямар журмаар явагдах талаар мэдээлэл өгсөн юм. 

Энэ талаар АН-ын даргын сонгуулийн хорооны дарга Ж.Оюунбаатар “АН-ын VI  Их хурлаас шийдвэрлэсэн томоохон асуудал бол намын даргыг бүх гишүүдээс сонгохоор болсон. Улмаар  Их хурлаас намын даргын сонгуулийг зохион байгуулах хороог байгуулсан.   Нийслэлийн 9 дүүрэг, 21 аймгаас нэг нэг төлөөлөгч орсон,  30 хүний бүрэлдэхүүнтэй сонгуулийн хороо энэ сарын 8-наас ажлаа эхэлсэн байгаа.

Одоогоор 4 дэд, 339 салбар хороотойгоор сонгуулийн бэлтгэл ажлаа хийгээд явж байна. Тэгвэл өнөөдрийн буюу арванхоёрдугаар сарын 12-ны өдрийн 10:00 цагаас АН-ын даргад дэвшигчдийг бүртгэл эхэлж байна. Бүртгэл энэ сарын 17-ны өдрийг хүртэл үргэлжилнэ.  Улмаар  19-ний өдөр АН-ын даргын сонгуульд нэр дэвшигчдийн үнэмлэхийг гардуулна. Тэр өдрөөс АН-ын даргад өрсөлдөх хүмүүсийн сурталчилгааны эрх нээгдэх юм.

Ерөнхийдөө АН-ын даргад өрсөлдөх хүмүүсийн сурталчилгааны ажил 21-ний өдрөөс идэвхжээд, улс орон даяар гишүүд, дэмжигчидтэйгээ уулзаад явах байх. Сурталчилгааны хугацаа 40 хоног байна. Харин намын даргын сонгуулийг ирэх оны нэгдүгээр сарын 29-ний өдөр хийхээр товлоод байна” хэмээлээ.