Ардчилсан намын зургадугаар их хурал Соёлын төв өргөөнд хоёр өдрийн турш хуралдсаны эцэст онцгойрох үр дүнгүй өндөрлөсөн.  Их хуралд 1200 гаруй АН-ыг дэмжигч гишүүд хүрэлцэн ирж, дотоод асуудлаа ярилцсан бөгөөд хаалганы цаана “ширүүн” зодоон, далд найраа ч өрнөөд амжсан гэдэг.  Тэгвэл АН-ын их хурлын хамгийн дуулиант төлөөлөгчдийн нэг нь  Төрийн соёрхолт, Гавьяат жүжигчин Д.Сосорбарам байлаа.  Түүний хувьд Их хурлынхаа үеэр намын удирдлагуудаа хатуухан  шүүмжилж, намаас гарна гэдгээ илэрхийлэн хаалга савж одсон нь хэсэгтээ л сошиал ертөнцийг шуугиулав. 

 

Гэтэл Со гэх мэт хүмүүс намаа шинэчлэгдэж чадсангүй хэмээн орхиж байхад эсрэгээр АН-ын экс гишүүд Их хурлыг сонирхож ирсэн нь ёстой л “тоон дотор үсэг цохиж явна” гэгчээр юм боллоо. 

 

Тодруулбал, БНН-ын дарга, “Буян”-гийн Жаргалсайхан намынхаа нарийн бичгийн даргыг дагуулан хуралд оролцлоо. Зарим төлөөлөгчид түүнийг танихгүй “Манай намд Жагаатай усны дусал шиг адилхан хүн байдаг юм байна” хэмээн андуурч явсан гэсэн шүү. Б.Жаргалсайханы хувьд ардчилсан хувьсгалд оролцож, уулзалт цуглааны төсөв зардлыг босголцож, хөрөнгө оруулж явсан хүний нэг аж.

 

Тийм ч учраас “АН-ыг байгуулж болсон юм чинь намын дарга нь болоод энэ намыг орох оромжтой, оочих аягатай болгож болно. Тийм туршлага байна, надад. Татгалзаад байх юм алга. Хоёр намд харьяалалтай байсан ч яадаг юм. Хорин намд ч байсан яадаг юм. 40 гаруй намд орж, улс орноо удирдаад явдаг хүн цаана чинь байна. Хүн үзэл бодлоо өглөө босоод шинэчилж болно шүү дээ” гэх тайлбарыг хэвлэлийнхэнд өгөөд амжсан байх юм. 

 

Магадгүй тэрбээр АН-ын гишүүнчлэлээ сэргээх бодолтой байгаагаа үүгээр илэрхийлсэн ч байж болох.  Түүнээс гадна “Ард түмнээ хайрлая” намын дарга Л.Гүндалай ч гэртээ зүгээр суухыг хүссэнгүй. АН-аас Хөвсгөл аймагт дэвшин УИХ-д хэдэнтээ сонгогдож явсан ч, хожим өрх тусгаарласан тэрбээр АН-ын их хурлын үеэр төлөөлөгчидтэй энд тэнд уулзалт зохион байгуулж, зоог барьсны зэрэгцээ “Би АН-ынхаа гишүүнчлэлийг сэргээж, 2017 оны Ерөнхийлөгчийн сонгуульд нэр дэвшинэ” гэж ярьсан сурагтай.  

 

Энэ мэтээр  АН-ыг зарим гишүүд нь орхиж, хаалгаа саван одож байхад, харин зарим нь “төрхөмдөө буцах”-ыг санаархах болжээ. Шинэчлэлт, намын дотоод асуудал, дүрмээ хэлэлцсэн АН-ын их хурал иймэрхүү л сонинтой өндөрлөлөө. Харин  парламентад нэг ч суудалгүй БНН-ын дарга “Буян”-гийн Б.Жаргалсайхан АН-ын даргад нэр дэвшиж, “Ард түмнээ хайрлая” намын  Л.Гүндалай  АН-аас Ерөнхийлөгчид нэр дэвшиж чадах эсэхийг бурхан л мэдэх байх даа.