Цөлжилттэй тэмцэх НҮБ-ийн конвенцын Талуудын 17 дугаар хурал буюу COP17 форум 12 өдрийн турш Монголд чуулж, газрын доройтол, цөлжилт, гангийн эсрэг бодит шийдэл, хамтын ажиллагаа, санхүүжилтийн шинэ боломжуудыг урагшлууллаа.  Монгол Улс СОР17 хурлыг даргалах ирэх хоёр жилийн хугацаанд олон улсын түншлэлээ бэхжүүлж, талуудын хамтын оролцоог ханган ажиллахаар болж байна. Тус хурлаас манай улсад орж ирэх үр өгөөж ямар байгааг олон нийт сонирхож байгаа Тэгвэл орж ирэх өгөөжийг шууд болон шууд бусаар тооцож үзэхэд нэгдүгээрт, COP17-г даргалагч улсын хувьд манай улсаас “Бэлчээрийн тэргүүлэх санаачилга”-ыг гаргасан. Үүнд 1.3 тэрбум долларын хөрөнгө оруулалт шийдэгдсэн байна. Мөн  “Ногоон дата төв”-ийн санхүүжилтийн эх үүсвэрийг шийдэх 10 санамж бичигт гарын үсэг зурлаа. Түүнчлэн  Азийн хөгжлийн банк болон түншүүд Ази-Номхон далайн бүс нутагт газрын доройтол, цөлжилттэй тэмцэхэд чиглэсэн санхүүжилтийг 2.0 тэрбум ам.доллар хүртэл нэмэгдүүлэхээр ажиллаж байна. Европын хөрөнгө оруулалтын банк ойн салбарт 100 сая еврогийн хөрөнгө оруулах эрмэлзлийн захидалд гарын үсэг зурсан. Ерөнхий дүнгээр Монгол Улс COP17 хурлаар 1.0 тэрбум 480 сая ам.доллар буюу 5.0 их наяд төгрөгийн төсөл хөтөлбөр хэрэгжүүлэхээр санамж бичгүүд байгууллаа. Бэлчээрийн мал аж ахуйг цөлжилтийн шалтгаан бус, зөв менежменттэй бол газрын доройтолтой тэмцэх дэлхийн чухал шийдлийн нэг гэдгийг онцоллоо. Монголын олон зуун жилийн нүүдлийн мал аж ахуйн мэдлэг дэлхийд улам үнэ цэнтэй болж байна хэмээн талууд дүгнэсэн байна.

2028 онд COP18 Египет Улсад зохион байгуулагдана

Даян дэлхийн ногоон хөгжлийн институтээс Улаанбаатар хотод 250 сая ам.долларын хөрөнгө оруулалт татна. Манай улсаас дэвшүүлсэн “Бэлчээрийн тэргүүлэх санаачилга”-д 45 төсөл хэрэгжүүлэхэд зориулан 1.2 тэрбум ам.долларын санхүүжилт зарлагдлаа. Түүнчлэн Люксембург Улстай хамтран Гангийн тэсвэржилтийн хөрөнгө оруулалтын шинэ механизмыг бий болгохоор ажиллаж эхэллээ. Мөн НҮБ-ын Цөлжилттэй тэмцэх конвенцын Уугуул иргэдийн бүлэг (Indigenous Peoples Caucus) болон Орон нутгийн иргэд, хамтын нийгэмлэгийн бүлэг (Local Communities Caucus) анх удаа албан ёсны уулзалтаа Улаанбаатар хотноо зохион байгуулав.  НҮБ-ын Цөлжилттэй тэмцэх конвенцын Гүйцэтгэх нарийн бичгийн дарга Ясмин Фуад онцлон тэмдэглэснээр, “ Энэхүү хурлын үр дүнг зөвхөн зарласан амлалт, санаачилгаар бус, санхүүжилт бодитой, үр дүнтэй төслүүдэд хүрч, хэрэгжиж чадсан эсэхээр нь үнэлэх учиртай” гэлээ.

12 өдөр үргэлжилсэн COP17 форумыг даргалсан Гадаад харилцааны сайд Б.Батцэцэг хэлэлцээр, форумын дүгнэсэн хэвлэлийн хурлын үер хэлэхдээ  “ Ц.Сандаг-Очир сайд бид хоёр арга билиг шиг нэгнээ нөхөж, зохицон ажиллаж, энэ их ачааллын ард гарлаа. Маш хүнд хэлэлцээ, уулзалтууд, ойлголцлуудыг давсан гэдгийг хэлмээр байна. Тодорхой үр дүнгүүд гарсан энэ тухай БОУАӨ-ын сайд Ц.Сандаг-Очир мэдээлнэ” гэсэн юм. Дараагийн COP18 ирэх 2028 онд Египет Улсад зохион байгуулагдана.

Эх сурвалж: “Зууны мэдээ” сонин

2026 ОНЫ НАЙМДУГААР САРЫН 31. ДАВАА ГАРАГ. № 162 (7904)

Хуурамч мэдээлэл хаа сайгүй тархах болсон энэ үед баримттай, эх сурвалжтай, үнэн бодитой мэдээллийг “Зууны мэдээ” сониноос аваарай.

Үнэн мэдээллийг хамтдаа хамгаалцгаая.

Бие даасан сэтгүүл зүйг дэмжин "Зууны мэдээ" захиалаарай. www.zuuniimedee.mn