Ерөнхийлөгчийн 2027 оны ээлжит сонгууль болоход 11 сарын хугацаа үлдлээ. “Сонгууль болох гэж байхад намууд таг байгаад байна” гэх яриа их бий. Гэтэл үүний оронд “СЕХ уг сонгуульд бэлэн үү үгүй юу” гэдгийг ярих хэрэгтэй юм. Учир нь СЕХ одоо болтол даргагүй байна.

Дээрээс нь сонгуулийн санал тоолох төхөөрөмж буюу бидний ярьдгаар саналын “хар машин”-ы ашиглалтын хугацаа дуусаж Ерөнхийлөгчийн 2027 оны ээлжит сонгуулийн саналыг тоолох боломжгүй болжээ. Манайхан саналын “хар машин”-д итгэдэггүй ч том жижиг 38 сонгуулийн саналыг түүгээр тоолсоор ирсэн. Гэвч уг төхөөрөмжийн ашиглалтын хугацаа дуусаад 5-6 жил болжээ.

Тиймээс Ерөнхийлөгчийн 2027 оны ээлжит сонгуулиас өмнө саналын “хар машин”-ыг шинэчлэх шаардлага үүссэн байна. Ингэхдээ өмнөх шигээ 3000 орчим саналын “хар машин”-ыг тендергүйгээр Америкаас авахаар бэлтгэлээ хангаад эхэлжээ. Учир нь тендер зарлахаар Ерөнхийлөгчийн 2027 оны ээлжит сонгуулиас өмнө амжихгүй гэх тайлбарыг зохион байгуулагчид хэлж байна.