Баяр, амралтын өдрүүдэд буюу энэ оны долдугаар сарын 11-16-ний өдрүүдэд гол, нуурын усанд нийт 25 хүн амь насаа алдсан ба үүнээс зургаа нь хүүхэд эрсэдсэн харамсалтай тохиолдол бүртгэгдээд байна.

Мөн Баянхонгор аймгийн нутаг дэвсгэрт “Хүүхдүүд үерийн усанд живж нас барсан байна” гэх дуудлага, мэдээлэл энэ оны долдугаар сарын 15-ны өдөр цагдаагийн байгууллагад бүртгэгджээ. Бүртгэгдсэн дуудлага, мэдээллийн дагуу шалгалтын ажиллагаа явуулахад 10, 13 насны хүүхдүүд живсэн байдалтай нас барсан байв.

Баяр наадам, аялал зугаалгын энэ үед эцэг эх, асран хамгаалагч та бүхэн бага насны хүүхдээ харгалзах хүнгүйгээр хараа хяналтгүй үлдээхгүй байх, гол мөрөн, тогтоол усны орчим тоглуулахгүй байх, тэдэнд усанд осолдох эрсдэлийг энгийн, ойлгомжтой үгээр тайлбарлан, ойлгуулж болзошгүй эрсдэлээс урьдчилан сэргийлэхийг Цагдаагийн ерөнхий газраас анхааруулж байна.