1,000,000 ам.долларын (3.5 тэрбум төгрөг) шагналын сантай "Intel Extreme Masters Dallas 2025" тавдугаар сарын 19-25-ны хооронд Америкийн нэгдсэн улсын Даллас хотод дэлхийн шилдэг 16 баг оролцсон тэмцээний шигшээ шатны тоглолтууд болж байна.

Тус тэмцээнд уригдаж оролцож байгаа The MongolZ баг оролцож байгаа бөгөөд А хэсэгт багтжээ. Эхний тоглолтоо дөнгөж сая Бразилийн Furai багтай тоглож 2-0  (Anubis 13-7, Mirage 13-7) харьцаагаар хожсон бол өнөөдөр /2025.05.21/ өглөө хоёр дахь тоглолтоо  Европын холбооны G2 Esports багтай тоглож 2-0 (Inferno 13-4, Dust2 13-7) харьцаагаар хожлоо.

Улмаар манай залуус шигшээ шатанд шалгарч байгаа бөгөөд А бүсийн аваргын төлөө Европын холбооны Team Vitality багтай маргааш /2025.05.22/ өглөө 07:00 цагт тоглоно. Өмнө нь хоёр баг нийт 12 удаа тоглоход манай залуус ердөө нэг удаад нь хожиж байжээ. Сүүлд хоёр баг IEM Melbourne 2025 тэмцээнд тоглож 0-2 (Nuke 3-13, Mirage 3-13) харьцаагаар хожигдож байжээ. Мөн Team Vitality баг нь 22 дарааллаж хожигдоогүй цувралтай үргэлжилж байна.

The MongolZ багийн бүрэлдэхүүнд дасгалжуулагчаар Баянбатын Эрдэнэдалай /maaRaa/, багийн ахлагч Мөнхболдын Содбаяр /Techno4K/, Бямбасүрэнгийн Гарьдмагнай /bLitz/, Банзрагчийн Өсөхбаяр /910/, Батболдын Аюуш /mzinho/, Мөнхболдын Азбаяр /Senzu/ нар тоглоно.