АНУ-ын сансар судлалын НАСА агентлагийн төхөөрөмж болох “DART” зонд солиртой мөргөлдөж чиглэлийг нь өөрчилж чаджээ.

163 метр диаметрийн хэмжээтэй “Диморф” солирын чиглэлийг өөрчлөх ажиллагааг олон нийтэд шууд дамжуулан үзүүлсэн юм. Хэрэв эх дэлхийг сансрын биет чиглэн ирж, бодит аюул нүүрлэвэл замд нь устгаж чадна гэдгийг энэ туршилт харууллаа.

Хос солирын чиглэлийг өөрчлөх туршилт хэмээн нэрлэгдсэн Double Asteriod Redirection test буюу DART төхөөрөмж нь 570 кг жинтэй бөгөөд орон нутгийн цагаар даваа гарагийн 23:14 минутад 20 мянга орчим км цагийн хурдтайгаар Диморф солирыг мөргөж чиглэлийг нь өөрчилжээ.

Солиртой мөргөлдөх үедээ дэлбэрч устсан DART зондыг өнгөрсөн оны 11 дүгээр сард “Space X” компанийн “Falcon 9” зөөгч пуужингаар хөөргөсөн юм.

Сансар судлалын түүхэнд солирын чиглэлийг өөрчлөх энэхүү анхны туршилтад тойрог замд байрлах 780 метрийн диаметртэй Дидим солир болон түүний дагуул 163 метр диаметртэй Диморф хос солирыг сонгосон юм.  Энэ хос солир нь дэлхий рүү үе үе ойртдог ч одоогоор манай дэлхийд аюул учруулаагүй байгаа юм. Дараагийн удаад Дидим Диморф хос солир 2026 онд дэлхийд ойртох юм байна.