ОХУ-ын иргэн монгол иргэнд халдсан гэх гэмт хэргийн талаар Цагдаагийн байгууллагаас мэдээлэл өглөө. 

ЦЕГ-ын хэвлэл мэдээллийн төвийн дарга Б.Баатархүү "Гадаад улсын иргэд гэмт хэрэг үйлдээд, эрүүгийн хэв журам хүндэрсэн асуудал байхгүй. ОХУ-ын иргэн хүн зодсон гэдэг мэдээлэл цахим орчинд цацагдсан. Ар гэрээс нь ч мэдээлэл өгсөн. Нягталж үзэхэд, зөрүүтэй мэдээллүүд гарсан. 

Бодит байдлыг дэлгэрүүлбэл, энэ сарын 22-23-нд ОХУ-ын иргэн Д манай улсад ирсэн. Улмаар хил дээр танилцсан иргэний байрыг түрээслэхээр болоод, энэ сарын 24-ний өдөр тухайн байршилдаа очсон. Очоод, түрээслэгчийн танил болох Г-гийн гэрт Монгол Улсын гурван иргэн, ОХУ-ын нэг иргэн согтууруулах ундаа хэрэглэсэн нь урьдчилсан байдлаар тогтоогдоод байна. Одоо мөрдөн шалгах ажиллагаа явагдаж байна. Эхний байдлаар, тухайн гэрт манай улсын иргэн Г, ОХУ-ын иргэд Д нар үлдэж, ОХУ-ын иргэн Г-гийн биед халдсан байж болзошгүй нөхцөл байдал тогтоогдсон. ОХУ-ын иргэнийг 48 цаг саатуулах арга хэмжээг өчигдөр авч хэрэгжүүлсэн. Мөн гэрт байсан Монгол Улсын хоёр иргэнийг саатуулсан. Мөрдөн шалгах ажиллагааны явцад гэмт хэрэг үйлдэх болсон шалтгаан тодорхой болох байх. 

Зарим хэвлэл мэдээллийн хэрэгслээр ОХУ-ын Элчин сайдаас асууна гэх ташаа мэдээлэл гарсан байна. Тухайн иргэн ямар нэгэн дипломат эрх ямба байхгүй. Уг иргэнийг саатуулах үйл ажиллагаа оройтсоныг хүмүүс буруугаар ойлгосон байх. Гадаадын иргэн учир тайлбар мэдүүлэг авахад хэлмэрчийг оролцуулах шаардлагатай байсан. Баянгол дүүргийн цагдаагийн газарт мөрдөн шалгах ажиллагаа үргэлжилж байна" гэв.