Олон улсын 7000 скаутчин хүүхэд, залуучууд Монголд чуулахаар болжээ. Тодруулбал, Монголын Скаутын Холбоо Ази Номхон Далайн Бүсийн 31-дүгээр Жембори хэмээх Скаут хүүхдүүдийн майхант зусланг энэ сарын 27-ноос эхлэн Олон улсын хүүхдийн “Найрамдал” цогцолборт зохион байгуулах гэнэ. Тус уулзалт нийт долоо хоног үргэлжлэх бөгөөд 11-17 насны хүүхэд залуучуудын майхантай, өөрсдөө хоол хийж иддэг чуулга уулзалт ажээ. Уг үйл ажиллагаанд Ази-Номхон далайн бүсийн орнууд, Европ, Америк тивийн нийт 40 орны 1500 скаут, Монгол Улсын 21 аймаг, есөн дүүргийн 4,000 гаруй скаут, сайн дурын 1500 гаруй удирдагч зэрэг нийт 7000 скаутчин оролцох юм байна.