2017 оны Ерөнхийлөгчийн сонгуулийн дүн парламентад суудалтай гурван намын нэр дэвшигчид хуваагдаж, улмаар аль нэг нь 50+1 хувийн санал авч чадаагүй учраас сонгуулийн санал хураалтыг дахин явуулахаар болсон. Өөрөөр хэлбэл, ирэх долдугаар сарын 7-ны баасан гарагт бүх нийтээр дахин санал хураалтад оролцож АН-ын нэр дэвшигч, нэгдүгээр шатанд ялалт байгуулсан Х.Баттулга болон МАН-ын нэр дэвшигч жагсаалтын хоёрдугаарт орж ирсэн М.Энхболд нарын хооронд өрсөлдөөн явагдах учиртай.

Энэ санал хураалтад урьдчилсан байдлаар долоон тэрбум төгрөг зарцуулах нь тодорхой болчихоод байгаа юм. Гэтэл улс төрд орж ирэх хязгааргүй шунал, хүслээ биелүүлэх гэсэн зарим нэгэн хүмүүс долоон тэрбум төгрөгийг зүгээр л салхинд хийсгэ хэмээн уриалж эхлэв. Бүр өөрийн эзэмшлийн хэвлэл мэдээллээр хүртэл өдөр шөнөгүй дахин санал хураалтыг хүчингүй болго хэмээн уриалж байх аж.

Энэ хүн бол МАХН-ын дарга Н.Энхбаяр. Магад С.Ганбаатарыг нэр дэвшүүлсэн хэтийн зорилго нь энэ байсан хэмээн бичиж буй улс төр судлаачид болон сэтгүүлчдийн таамаг зөв байсныг эрхэм даргын ийм ичгүүргүй уриалгаас харж болохоор. Н.Энхбаяр ба түүнийг тойрон хүрээлсэн цөөн хэдэн хүмүүсийн хүсэл мөрөөдлийг биелүүлэх гэж дахин санал хураалтын хувь хүрэхгүй болвол энэ удаагийн сонгуулийг хүчингүй болгох нөхцөл байдал үүснэ. Улмаар шинээр сонгууль хийж, дахиад л 20 гаруй тэрбум төгрөгийг улсын төсвөөс гаргана.

Намууд цоо шинэ нэр дэвшигчийг гаргаж ирэн өрсөлдөж, сурталчилгаа явуулж бүтэн намрын турш дахиад л улс төрийн улаан хэрүүл гарах билээ. Харин тэр цагт Н.Энхбаярын ялтайд тооцох хугацаа дуусах учраас өөрөө өрсөлдөөнд орж ирнэ хэмээн төлөвлөж буй нь дахин санал хураалтыг хүчингүй болго хэмээн уриалж буйгаас нь харагдаж байгаа юм. Улс төрийн бохир заваан тоглоом, хэрүүлээс ард түмэн үнэхээр залхчихаад байна.

Тиймээс иргэд энэ мэт өс хонзонгийн сэдлээр бохир тоглоом сэдэж буй улстөрчдийн башир аргад автах нь юу л бол. Н.Энхбаяр төрийн толгойд эзэн суувал улс төрийн толхилцоон, өс хонзонгийн сэдэлтэй баривчилгаа хэрээс хэтрэх учраас ядарсан ард түмнийхээ сэтгэлзүйгээр наадсан ийм арчаагүй улстөрчдөд боломж олгохгүй байхсан. Ядарсан эдийн засагтай улс оронд дахин санал хураалтад үрж буй долоон тэрбум төгрөгөөр хэчнээн олон сургууль цэцэрлэг барихыг тооцоод үзье.

Гэтэл дахин санал хураалтаа нэг улстөрчийн эрх ашигт хүлэгдэж хүчингүй болгочихоод дахиад шинэ сонгууль хийвэл мөн л тэр тооны мөнгө салхинд хийснэ. Ард түмний халааснаас авсан мөнгөөр улстөрчдийн хүсэл мөрөөдлийг биелүүлэх хэрэг үү.  Н.Энхбаяр ба түүний нөхдийн халааснаас энэ мөнгө гарахгүй гэдгийг хатуухан сануулчихъя. Монгол Улс парламентын засаглалтай. Төрийн чухал шийдвэр бүхэн парламентаас гардаг.

Харин Ерөнхийлөгч хүн зөвхөн эв нэгдлийн бэлэг тэмдэг төдий. Тиймдээ ч хэн суух нь хамаа алга. Готов нь авна уу, Шадав нь авна уу хамаа алга гэдэг шиг л хэн суух нь хамаагүй хэрэг. Гагцхүү ард түмнийг хагаралдуулж, төрийн тэргүүний суудлаар өс хонзонгийн улс төр битгий хийгээсэй гэж хүсч байна. Тэрбум тэрбумаар нь гаднаас гуйж суугаа ядарсан улс орон нэгхэн хүнийг дугуйлахын төлөө хэчнээн сургууль цэцэрлэгийн мөнгөөр туйлах ёстой гэж. Тиймээс энэ удаагийн дахин санал хураалтад иргэд минь идэвхтэй оролцоорой. Тэгж байж л бид хэдэн арван тэрбум төгрөг салхинд хийсэхээс сэргийлэх учиртай юм. Үнэхээр л эх оронч иргэд мөн бол энэ удаад та улсынхаа эдийн засгийн төлөө, халааснаас чинь гарч буй татварын мөнгийг хий дэмий үрэхгүйн төлөө сонголт хийгээрэй.

Б.Эрхэс