Архангай аймгийн таван суманд галзуу өвчин гарчээ. Тодруулбал, Архангай аймгийн Хашаат, Жаргалант, Цэцэрлэг, Өндөр-Улаан, Хотонт зэрэг суманд нийт 11 удаагийн малын галзуу өвчний тохиолдол бүртгэгдсэн байна. Галзуу өвчин гарсантай холбогдуулан тус аймгийн Онцгой комиссын хурлын шийдвэрээр галзуу өвчин гарсан сум, багуудад мэргэжлийн багийн бүрэлдэхүүнтэй ажлын хэсгийг ажиллуулахаар шийдвэрлэжээ.

Галзуу өвчин гарах болсон шалтгаан нь ихэнх нь үнэг, чоно мэтийн зэрлэг амьтан мал руу ноцож  хазсантай холбоотой гэнэ.  Зэрлэг амьтанд хазуулж халдвар авсан таван үхэр, таван хонь, хоёр ямаа, нэг ишиг, нэг адуу, нэг согоо, нэг үнэг, нэг нохойг өвчин гарсан тухай бүр нь даруй устгажээ. Цаашид ч нэмэгдэж гарч болзошгүйг Зоонозын төвөөс анхааруулсан байна. Галзуу өвчний вакциныг захиалсан байгаа ч одоог хүртэл ирээгүй байгаа ажээ.