Хилийн дээс алхан ажиллаж амьдарч байгаа монголчууд гадаад улс орон ажиллаж амьдарч байхдаа амиа алдах, улмаар гэмт хэрэгт холбогдох тохиолдол буурахгүй байгаа. Хамгийн сүүлд гэхэд л Герман улсад ажиллаж амьдардаг залуу бусдын амь насанд онц хэрцгийгээр халдсан тохиолдол гарсан билээ.

Манай улсаас гадаад улс орнуудад ажиллаж амьдарч буй иргэдийн хувьд хулгай, хар тамхины хэрэгт ихэвчлэн холбогддог гэсэн тоон судалгаа гарчээ. Тодруулбал, энэ оны эхний гурван сарын байдлаар гадаадад ял эдэлж буй иргэдийн тоо 171-д хүрсэн байна. Эндээс 25 хувь нь хар тамхи, 30 хувь нь хулгай, 20 хувь нь танхай, 20 хувь нь хүн амины хэрэг үйлдсэн бол таван хувь нь бусад төрлийн гэмт хэрэгт холбогджээ.

Мөн энэ оны эхний гурван сарын байдлаар Монгол Улсын 12 иргэн гадаадад ямар нэг шалтгаанаар нас барсан харамсалтай мэдээлэл байна. Гадаад улс орнуудад гэмт хэрэгт холбогдсон бол тэндээ ял эдэлж, бүх насаараа хоригдох эмгэнэлтэй тохиолдол бишгүй бий. Гэвч ардчилсан Монгол Улс маш олон улстай дипломат харилцаатай учраас хамтын ажиллагааны хүрээнд хэд хэдэн улс орнуудтай ялтан шилжүүлэх гэрээнд гарын үсэг зурсан байдаг.

Өөрөөр хэлбэл, тэдгээр иргэд харийн оронд биш эх орондоо ялаа бүрэн эдлэх боломжтой юм. Өнгөрсөн онд гэхэд л манай улс Хятад улсаас хоёр, Казахстан улсаас нэг ялтанг эх оронд нь ялыг нь эдлүүлэхээр авч ирсэн. Өнгөрсөн онуудад нийт 10 орчим иргэдийг ялтан шилжүүлэх гэрээгээр авч ирсэн бол цаашид энэ тоог нэмэхээр ажиллаж буйгаа Гадаад хэргийн яамны албан тушаалтнууд онцолж буй юм.

Ялтан шилжүүлэх гэрээг манай улс одоогоор 56 улстай байгуулсан бөгөөд эдгээр улс орнуудад ял эдэлж буй иргэддээ хүсэлт ч явуулаад байгаа аж. Өөрөөр хэлбэл, та энэ ялаа эх орондоо эдлэх сонирхолтой байна уу гэсэн хүсэлт явуулжээ. Тухайн иргэн зөвшөөрсөн тохиолдолд гэрээний дагуу Засгийн газрын төвшинд яриа хэлэлцээ явагдаж улмаар шилжүүлэх эрх үүсэх юм байна.

Нөгөө талаар, БНСУ өнгөрсөн сараас эхлэн визний журмаар өөрчилж, визгүй зорчиж байсан иргэдийг визтэй болгосноор хууль бусаар оршин сууж байгаа иргэдийн тоо ч нэмэгдэх хандлагатай байгаа аж. Тус улсад ажиллаж амьдарч буй иргэдийн тоо 35 мянгад хүрч, улмаар 10 орчим хувь нь хууль бусаар ажиллаж амьдарч байна гэсэн тоо гарчээ.

Б.Тогтох