Төрийн өмчийн компанийн Гүйцэтгэх захирал албан тушаалтай нэгэн эрхэм 24.5 сая төгрөгийн цалин авна гэсэн яриа хэсэгтээ л нийгмийн анхаарлыг татсан. Ядахад, манай хэвлэлийнхэн 25 сая хэмээн ташаа мэдээлэл өгч эрхэм даргын уурыг барсан сурагтай. Гүйцэтгэх захирлын цалинд 500 мянган төгрөг нэмж бичсэн хэргээр золтой л шүүхэд дуудагдчихаагүй. Уг нь Ерөнхий сайдын хэлснээр бол Төрийн өмчийн компани чинь ард түмний өмч юм билээ. Төр л гэсэн халхавч байгаа болохоос ард түмэн энэ компанийн үйл ажиллагаанд хяналт тавьдаг, бараг л дарга цэргээ хэнээр томилохоо мэддэг эрхтэй юм уу даа.

Тиймээс ч ард түмэн 24.5 сая төгрөгийн цалин өгөх шийдвэр гаргасан хэрэг л дээ. Үгүй мөн тансаг байгаа юм шүү. Эндээс харвал, монголчууд тун ч баян ард түмэн бололтой. Төрийн өмчийн компанийн нэг захиралдаа 10 сая ам.долларын цалин өгөөд л. Тэгсэн атлаа өөрсдөө Төрийн өмчийн компанийн Гүйцэтгэх захирлынхаа өдрийн цайны мөнгөөр цалинждаг. Харамсалтай нь бодит байдалд ард түмний өмч гэдэг нь үлгэр, дарга нарын мөрөөдөл төдий.

Оноо авах гэсэн арга ядсан шоу. Нийт монголчуудын авч буй цалингаас хамгийн өндөр нь 800 ам.доллараар цалинждаг. Хувийн хэвшлийн томоохон компанид ажиллаж буй залуус л ийм хэмжээний цалин авна. Харин төрийн албанд ажиллаж буй залуусын дундаж цалин 350 ам.доллар. Монгол мөнгөөр тооцвол 700 мянган төгрөг. Жижиг аж ахуйн нэгж, хувийн хэвшлийн үйлдвэр, үйлчилгээний газрууд бол цалингийн доод хэмжээгээр буюу 120 ам.доллараар ажилчдаа цалинжуулдаг. Гэтэл Статистикийн байгууллагаас гаргаж буй мэдээллээр монголчуудын дундаж цалин нэмэгдсэн гэнэ ээ. Нарийн тооцооллоор 700 ам.доллар буюу ойролцоогоор 1.400.000 төгрөг болсон гэх. Бүр ядуурал ч эрчимтэй буурч байгаа юм уу даа.

Улирал болгон гаргадаг дүн мэдээгээр цалин нэмэгдсэн мэдээлэл гардаг атлаа, начир дээрээ цайны мөнгөөр цалинжсан хэвээр л байх. Эндээс болж статистикийн байгууллага худлаа мэдээлэл цацдаг. Ядарсан ард түмнээ доромжилдог гэх мэтээр бухимдал их гарах болжээ. Гэхдээ зайлуул тэдний буруу биш юм билээ. Статистикийн байгууллага зөвхөн цалингийн доод болон дээд хэмжээг дундажлан тооцож гаргадаг аж. Өөрөөр хэлбэл, Монголд хамгийн өндөр цалин авч байгааг болон хамгийн бага буюу цалингийн доод хэмжээг нийлүүлж тооцохоор дундаж цалингийн хэмжээ гардаг бололтой юм.

Ингээд тооцохоор 24.5 сая төгрөгийн цалинг, хамгийн бага буюу 240.000 төгрөгт хуваахаар дундаж нь мэдээжийн хэрэг өндөр гарч таарна. Тиймээс статистик тоо баримт худлаа гарч байна гэх мэтээр бухимдах нь илүүц хэрэг болж байгаа юм. Ядуурал ч гэсэн ялгаагүй. Тэд айл бүрээр орж талх таллаж авч байна уу гэдгийг тоолох боломжгүй. Нийгмийн халамжийн авсан судалгаа тооцоонд үндэслэж л ядуурал буурсан уу, өрх айлд цахилгаан хэрэгсэл нэмэгдсэн үү гэдгийг тооцож гаргана. Тиймээс тоон баримт буруу байна гэж үглэх нь илүүц байгаа юм.

Бодит байдал, тоон мэдээлэл хоёр хэзээ ч нийлж байгаагүй учраас амьдралын бодит үнэнийг дарга нар тооноос биш гэр хорооллоор орж олж авах учиртай. Амьдрал хэцүү байгаа. Хоногийн хоолоо арайхийн залгуулж буй нийгмийн дийлэнх хэсгээс гадна хоёр идэж хоосон хонохгүй амьдарч яваа дундаж бүлгийн иргэдийн амьдрал зутруухан байгааг нуугаад яах вэ. Тиймээс дарга нар минь статистикийн тоонд итгэж суух биш эгэл амьдрал дунд орж ажилла. Цалин нэмэгдчихсэн зүйл огтхон ч алга. Сүүлийн хоёр жилийн хугацаанд нэг ч байгууллага цалингаа нэмсэн гэсэн сайхан мэдээ дуулгаагүй.

Доодчуулын биш дээдсийн цалин, хангамж л нэмэгдээд байгаа учраас цалин нэмэгдчихсэн юм шиг ялгаа гараад байгаа юм. Ард түмний орлого нь биш хэрэглээ нь өсч, хувцас угаах машин, хоолоо хийж идэх будаа агшаагч ганц нэг нэмэгдсэн учраас л ядуурал буурчихсан юм шиг харагдаад байна. Ажилгүй болсон залуус харь орныг зорьж хэдэн арваараа боолын хөдөлмөр эрхлэхээр явж байгаа учраас ажилгүйдэл багасчихсан юм шиг мэдрэгдэж байгаа төдий. Үнэхээр л эгэл ардынхаа амьдралыг мэдмээр байгаа бол төрийн дарга нарынхаа цалинг бууруулаад үз. Ямар ч хэрэггүй ТУЗ-ийн гишүүдийнхээ цалинг хасаад үз. Тэр цагт бодит тоон баримт гарч л таараа.