ХҮН-аас Ц.Нямдорж, Л.Болд нарт хариуцлага тооцохыг Ерөнхийлөгчөөс хүслээ

ХҮН-аас Ц.Нямдорж, Л.Болд нарт хариуцлага тооцохыг Ерөнхийлөгчөөс хүслээ

ХҮН-аас Монгол Улс яагаад “Саарал жагсаалт”-д багтах болсон талаар мэдээлэл хийлээ. Тэд “Камбож, Шриланк зэрэг буурай эдийн засагтай, засаглал нь ил тод бус, дайн самуунтай улс орнуудтай хамт саарал жагсаалт орсон нь байж боломгүй зүйл. Олон улсын байгууллага санал нэгтэйгээр Монголыг оруулсан нь анхаарал татсан үйл явдал боллоо. Саарал жагсаалтад орсноор гадаадын банкууд Монголд үйл ажиллагаа явуулахдаа хязгаарлалтад орно, гадагшаа болон дотогшоо санхүүгийн гүйлгээ хийхэд шимтгэл өсч, хугацаа алдана. 200 гаруй мянган гадаадад амьдарч байгаа иргэдийн асуудал хөндөгдөх нь. Түүнээс гадна зээлжих зэрэглэл буурч, гадаадын санхүүгийн хөрөнгө оруулалт огцом буурна. Ингснээр гадаад валютын ханш савлаж, төгрөг үнэгүйдэнэ” хэмээн тодотголоо.

Ийнхүү тэд саарал жагсаалтад багтах болсон гурван шалтгаан байсныг эрэмбэллээ.

Нэгдүгээрт авлига, албан тушаалын маш том хэргүүд шүүх, прокурорын шатанд хэрэгсэхгүй болсон байна. ЖДҮ, 60 тэрбум, концесс, Эрдэнэтийн 49 хувь гэх мэт асуудал шийдэгдсэнгүй. Олон улсын байгууллагын зүгээс манай улсын хуулийнханд дэвшил гарсан ч шийдэгдэхгүй асуудал олон байгаагийн ард мөнгө угаах эх үүсвэр яваад байна гэсэн том хардлагыг төрүүлж байна.

Хоёрдугаарт, 2015 онд эдийн засгийн ил тод байдлын тухай хууль баталснаар 34 их наяд төгрөгийн хууль бус мөнгийг хуулийн болгож өршөөсөн. Дэлхийн аль ч улс оронд байдаггүй бөгөөд бид анхдагч болсон. Энэ хууль эргээд нэр бүхий зургаан банк эх үүсвэрээ бүрдүүлэхдээ тодорхойгүй, ил биш үүсвэрээр дүрмийн сангаа өсгөсөн байдал.

Гуравдугаарт, Хойд Солонгос улстай харилцаа үүсгэсэн. Тухайн үеийн Батлан хамгаалах яамны сайд нь Хойд Солонгост зэвсэг худалдсан, тус улсын маш олон ажиллах хүчнийг Монголд ажиллуулсан, тэдний орлого нь цөмийн хөтөлбөрийг санхүүжүүлэх тодорхой хэсэг нь болсон гэж олон улсын байгууллагууд дүгнэсэн.

Тиймээс тус намаас Ерөнхийлөгчид  томоохон албан тушаалын хэргүүдийг яаралтай таслан шийдвэрлэх, Монголбанкны удирдлагад хариуцлага тооцох, Мөнгө угаах терроризмтэй тэмцэх хорооны дарга Ц.Нямдорж хэрэг завших боломжийг хангасан гэж үзэж байгаа учраас түүнд хариуцлага тооцохыг шаардлаа. Мөн Батлан хамгаалахын сайдаар ажиллаж байхдаа Хойд Солонгост зэвсэг наймаалцсан УИХ-ын гишүүн Л.Болд нарт хариуцлага тооцох шаардлага хүргүүллээ.

ХОЛБООТОЙ МЭДЭЭ
МЭДЭЭНИЙ СЭТГЭГДЭЛ

АНХААРУУЛГА:Уншигчдын бичсэн сэтгэгдэлд mminfo.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 99998796 утсаар хүлээн авна.