Европын хамгийн нэр хүндтэй тэмцээн болох Аваргуудын лигийн 1/8 шигшээн үлдсэн дөрвөн тоглолт өнөө, маргааш шөнө болно. Өнөө шөнө Английн “Манчестер Сити” клуб талбайдаа Францын “Монако”-г хүлээж авах юм. Хамгийн гол нь хоёр баг анх удаагаа учраа таарч тоглох гэж байна. Өнгөрсөн жил “Сити” шөвгийн дөрөвт үлдэж, “Реал”-д хоёр тоглолтын нийлбэр дүнгээр 1:0-ээр хожигдож байсан. Харин “Монако” тийм ч амжилттай байгаагүй.

Тиймдээ ч “Манчестер Сити”-гийн талд боломж илүү байгаа гэхэд болно. Мөн талбайдаа хийж буй тоглолтод олон гоолын зөрүүгээр хожиж чадвал дараагийн шатанд шалгарах боломжтой.  Одоогоор “Сити”-гээс Агуэро Аваргуудын лигт 6 гоолтой байгаа бол “Монако”-гаас Фалькао 4-ийг хийсэн.

Хоёр багийн статистик

Манчестер Сити

-Энэ бол хоёр багийн хоорондын анхны тоглолт

-Манчестер Сити Европын тавцанд Францын багийн эсрэг хэзээ ч хожигдож байгаагүй. “ПСЖ” клубын эсрэг гурав тоглохдоо нэг хожиж, хоёр тэнцсэн.

-“Сити” Аваргуудын лигийн сүүлийн 8 тоглолтод ганц ч хожигдоогүй. 5 хожиж, гурав тэнцээд байгаа юм. Энэ 8 тоглолтдоо 5 гоол алдсан юм.

-Агуэро Этихад цэнгэлдэхэд Аваргуудын лигийн сүүлийн 6 тоглолтод ердөө ганцхан гоол оруулсан. Тэр дундаа хасагдах шатанд ганц ч удаа гоолдож чадаагүй байна.

Монако

-Монако Английн багуудтай хасагдах шатанд учраа таарсан тоглолтууддаа бүгдэд нь хожсон. 1997-1998 оны улиралд “Манчестер Юнайтед”-ыг, 2003-2004 онд “Челси”-г, 2014-2015 оны улиралд “Арсенал”-ыг мулталсан.

-Монако Аваргуудын лигийн хүрээнд Английн багуудын талбайд зочилсон сүүлийн таван тоглолтдоо энэ тэнцүү хожиж, хожигдсон. Тодруулбал, хоёр хожиж, хоёр хожигдож, нэг тэнцсэн. Хамгийн сүүлд 2015 онд “Арсенал”-д, 2016 онд “Тоттенхэм”-д хожигдсон.

-Монако Аваргуудын лигт дөрвөн удаа хэсгээ тэргүүлсэн. 2003-2004, 2004-2005, 2014-2015, 2016-2017 оны улиралд хэсгээс нэгээр гарчээ.

Н.Болд