Хүний эрхийн үндэсний комиссоос Ерөнхий сайд Ж.Эрдэнэбатад хандан хүйтний улиралд хурдан морины уралдаан зохион байгуулахгүй байхыг уриалсан зөвлөмж хүргүүлжээ. Тус зөвлөмжид НҮБ-ын Хүүхдийн сангийн албан ёсны мэдэгдэл, Хүний эрхийн үндэсний комиссын удаа дараагийн анхааруулга, зөвлөмжийг үл ойшоож өнгөрсөн оны мөн үед Төвийн бүсийн хаврын морин уралдаан, Дүнжингарав зэрэг хэд хэдэн уралдаан зохион байгуулж, хүүхдийн эрхийг ноцтой зөрчин, олон хүүхэд эрүүл мэндээрээ хохирсон.

Тиймээс хүний эрхийн зөрчлөөс урьдчилан сэргийлэх зорилгоор өвөл, хаврын хурдан морины уралдаанд хүүхдийг оролцуулахгүй байхыг хүссэн байна. Мөн тус улиралд ямар нэгэн уралдаан зохион байгуулахгүй байх тухай Засгийн газраас шийдвэр гаргахыг хүсчээ. Өнгөрсөн жил гэхэд Төвийн бүсийн морин уралдааны үеэр 16 хүүхэд мориноос унаж, хоёр нь хүнд бэртсэн ажээ.