Хөдөө, орон нутагт хот хоорондын зорчигч тээврийн автобусаар явна гэдэг хэдхэн жилийн өмнө хэцүүхэн даваа байлаа. Тэр дундаа,  хот хоорондын зорчигч тээврийн автобусны тасалбар олж авах гэж нэлээд цаг хугацаа алдана. Аль нэгэн аймаг руу явахын тулд заавал урд өдөр нь аль эсвэл өглөөний нартай уралдан босч тасалбар авдаг байсан цаг саяхных.

Гэхдээ технологийн дэвшлийг төрийн үйлчилгээнд нэвтрүүлснээр иргэдэд учрах энэхүү хүндрэл, чирэгдэл, хүнд суртал арилаад нэг жилийн хугацаа өнгөрчээ. Тодруулаад хэлбэл, Автотээврийн үндэсний төвийн Хөдөлгөөний хяналтын хэлтэст 1900-1234 хэмээх тусгай дугаарын утас ажиллаж эхэлснээр авто зам болон зорчигч тээвэрлэлттэй холбоотой зарим үйлчилгээг онлайнаар иргэдэд хүргэх боломжтой болжээ. Тиймээс Автотээврийн үндэсний төвийн Хөдөлгөөний хяналтын хэлтсийн лавлах төвөөс энэ удаагийн өдрийн сурвалжлагаа бэлтгэлээ.

Автотээврийн үндэсний төвийн хоёр давхарт байрлах Хөдөлгөөний хяналтын хэлтэст суурин утас тасралтгүй дуугарах аж. Энэ бол иргэдэд хэрэгтэй зөвлөгөө, мэдээллийг хүргэдэг 1900-1234 тусгай дугаарын утас гэнэ. Энэхүү лавлах утсанд одоогийн байдлаар таван мэргэжилтэн ажиллаж, иргэдэд хэрэгтэй мэдээллийг өгч байгаа талаар тус хэлтсийн ахлах мэргэжилтэн Б.Мөнхчулуун онцолж байв. Мөн 1900-1234 тусгай дугаарт холбогдох иргэдийн тоо ихэссэнээс болж ачаалал нь нэмэгдсэн байна. Үүнтэй холбогдуулан лавлах утасны мэргэжилтнүүдийн тоог нэмэх арга хэмжээг цаашид авахаар бэлтгэж байгаа юм байна. Биднийг ийн ярилцаж зогстол утас дуугарч байна. “Миний машиныг “pruis 20” маркийн машин хааж зогсчихоод утасны дугаараа үлдээ­гээ­гүй байна. Эзэнтэй нь холбож өгөөч” хэ­мээх иргэний дуудлага орж ирэв.

Тэр даруйд үйлчилгээний ажил­тан тухайн машины улсын дугаараар ямар компани, иргэнд харьяалалтайг нь мэдэн дуудлага өгсөн иргэнтэй шууд холбож өглөө. Энгийнээр хэлэхэд, операторууд тухайн автомашиныг улсын дугаараар нь шүүж, эзнийг нь тогтоогоод хэрэглэгчтэй шууд холбох үйлчилгээ үзүүлдэг гэнэ. Ингэснээр иргэнд түргэн шуурхай үйлчилгээг хүргэж чаддаг байна. Энэ бол 1900-1234 тусгай дугаарын үйлчилгээнээс авч болох бас нэгэн үйлчилгээ нь ажээ. Иргэд бусдын автомашиныг хааж, холбоо барих утасны дугаараа үлдээгээгүй явсан тээврийн хэрэгслийн эзэмшигч­тэй Автотээврийн үндэсний төвийн 1900-1234 лавлах утас руу залгаж, холбогдох боломжтой болсон байна.

Дараагийн нэгэн онцлох үйлчилгээ нь байршил тогтоох үйлчилгээ аж. Тухайлбал, улс, хот хоорондын зорчигч тээврийн автобус хаана явж байгааг мэдэхийг хүсвэл тусгай дугаарт хандаж авах боломжтой гэдгийг мэргэжилтнүүд онцолж байлаа.

Ингэснээр ах, дүү, хамаатан садан, үр хүүхдээ хаана явж байгаа, аюулгүй эсэхийг мэдэх боломжтой юм байна. Энэ мэтчилэн олон үйлчилгээг иргэдэд үзүүлэх болжээ. Үйлчилгээний төрөл нэмэгдэхийн хэрээр лавлах утсанд хандах иргэдийн тоо нэмэгдсэн гэнэ. Энэ талаар лавлах үйлчилгээний ажилтан Д.Үүрийнтуяа “Манай 1900-1234 тусгай дугаарын утсанд хандаж буй дуудлагын дийлэнх хувийг гарц хааж зогссон тээврийн хэрэгслийн эзэмшигчтэй холбогдох дуудлага эзэлдэг. Иргэд ихэвчлэн улс, хот хоорондын зорчигч тээврийн байршил, тасалбар захиалгын үйлчилгээ авч байна. Мөн татвар, даатгал, архив лавлагааг авдаг” гэв.

Ингээд бид Автотээврийн үндэсний төвийн Хөдөлгөөний хяналтын хэлтсийн ахлах мэргэжилтэн Б.Мөнхчулуунтай цөөн хором ярилцлаа.

-1900-1234 тусгай дугаарын утас ажиллаад нэг жил болж байна. Энэ хугацаанд иргэдэд аль хэдийнэ танигдсан. Тэгэхээр өнгөрсөн хугацаан дахь ажлаа дүгнээд ярьвал?

Манай Автотээврийн үндэсний төв ард иргэдэд авто тээвэртэй холбоотой мэдээ, мэдээллийг түргэн шуурхай үнэн бодитойгоор хүргэх зорилгоор автотээврийн нэгдсэн лавлах 1900-1234 тусгай дугаарын утсыг ажиллуулаад нэг жил болж байна. Ер нь сар болгоны мэдээг аваад үзэхэд манай дуудлагын хэмжээ байнгын өсөлттэй гарч байгаа. Энэ нь манай лавлах төвөөс өгч байгаа мэдээлэл ард иргэдэд хүрч байгаагийн нэг илрэл болов уу хэмээн бид харж байна.

-Иргэд тусгай дугаарын утаснаас ямар үйлчилгээг авах боломжтой вэ?

-Манай тусгай дугаарын лавлах утаснаас иргэд хэд хэдэн үйлчилгээг авах боломжтой. Тухайлбал, тээв­рийн хэрэгслийн бүртгэл, улсын дугаар солих, шилжилт хөдөл­гөөн бүртгүүлэх, хасуу­лах, лавлагаа авах, явуулын дугаар олгох, цагийн хуваарь, байршил, үнэ тариф, бүрдүүлэх баримт бичгийн жагсаалт, мөн техникийн хяналтын үзлэгтэй холбоотой мэдээлэл, техникийн хяналтын үзлэгт орох цаг захиалах, хэрэглэгчийн байршилд тохирсон ачаалал багатай салбар хаана байгаа зэргийг мэдэх боломжтой. Үүнээс гадна улс, хот хоорондын ачаа, зорчигч, жуулчин тээвэр, авто үйлчилгээ, мэргэшсэн жолооч, тээврийн хэрэгслийн татвар, даатгалтай холбоотой бүхий л мэдээллийг нэг дор хүлээн авч болно. Нийт дуудлагаа ажиглаад үзвэл ихэнх тохиолдлыг зам гарц хаасан дуудлага ирдэг.

-Цаашид ямар арга хэмжээ авах вэ. Тусгай дугаарын утасны ачаалал нэмэгдсэн гэж хэллээ. Тэгэхээр хийх ажил олон байгаа байх?

-Ер нь манай дуудлагын ачаалал маш их байдаг. Тиймээс лавлах шугамны тоог өргөтгөх ажлыг төлөвлөж байна. Нэг үгээр хэлбэл, лавлагаа өгч байгаа мэргэжилтнүүдийн тоог олон болгох юм. Мөн авто вокзал руу явах, интернэтэд холбогдох боломжгүй хэрнээ тасалбар захиалах хүсэлтэй хүмүүс байж болно шүү дээ. Ийм тохиолдолд 1900-1234 тусгай дугаарын утсаараа тасалбарын захиалга авдаг болгохоор зорьж ажиллаж байна. Энэ мэтчилэн олон ажлыг шат дараатайгаар хийхээр төлөвлөсөн.