СЕНСААЦИЙН ЭРГЭН ТОЙРОНД

Монголчууд бид 2016 оноо үдэж, 2017 оноо угтаад л нэгэн аймшигт мэдээг сонсч, хирдхийсэн. Тэр нь Хятад улсын иргэн дөрөвхөн настай хүүхдийг заазуурдаж, амь насыг нь хөнөөсөн хэрэг билээ. Гэр бүлийн хүчирхийллээс үүдэлтэй энэ хэргийн хохирогч нь зөвхөн нэг хүүхэд байгаагүй. Тиймээс “Монголын мэдээ” сонин энэ удаагийн “Онцлох хуудас”-аараа энэхүү хэргийг онцолж байна. Өмнө нь төрсөн эцэг нь хүүхдээ заазуураар зүсч, танхайрч байсан хэрэг манайд гарч байсан. Гэр бүлийн хүчирхийлэл. Тэгвэл энэ удаад гэр бүлийн хүчирхийлэлтэй холбоотойгоор нэгэн бяцхан хүүхдийн амь нас хохирчихоод байна.

Хятад улсын иргэн дөрвөн настай Монгол хүүг заазуурдаж, амь насыг нь хөнөөжээ

2017.01.02: Он гарсны дараа буюу ажлын эхний өдөр зүрх зүсэгдэм мэдээлэл гарсан. Энэ талаар сайтууд “Он солигдох мөчид буюу өнгөрсөн арванхоёрдугаар сарын 31-нд дөрөвхөн настай монгол хүүхдийг Хятад улсын иргэн хөнөөсөн хэрэг гарчээ. Тодруулбал, Сонгинохайрхан дүүргийн 19 дүгээр хороонд амьдардаг Хятад улсын иргэн Ө согтууруулах ундаа хэрэглэн, танхайрч өөрийнхөө дагавар хүү болох дөрвөн настай А-г заазуурдаж, амь насыг хөнөөсөн байна.  Үүгээр ч үл барам тэрбээр 46 настай Х-гийн толгойн баруун хэсэг, 13 настай Б-гийн зүүн гарыг тус бүр 2-3 удаа заазуурдаж, гэмтээжээ.Уг хэргийг СХД-ийн цагдаагийн хэлтэс шалгаж байна. Цагдаагийн байгууллагаас мэдээлж буйгаар хохирогч хүү газар дээрээ нас баржээ” хэмээн мэдээлсэн юм.

Хятад улсын иргэнд 20-25 жилийн ял онооно

2017.01.03: Хэрэг гарсны дараа Хятад улсын иргэнийг цагдаагийнхан баривчлан саатуулсан. Тэгвэл цахим сайтууд түүнийг ямар зүйл ангиар шүүх талаар мэдээлж байсан юм. Тухайлбал, “Дөрөвхөн настай хүү хятад залуугийн гарт амиа алдсан харамсалтай хэрэг гарсан. Тодруулбал,  өнгөрсөн арванхоёрдугаар сарын 31-нд Хятад улсын иргэн согтуурсан үедээ хамтран амьдардаг монгол улсын иргэн Х гэх эмэгтэйг хүйтэн мэсээр гэмтээж, түүний хүү болох дөрвөн настай А-г заазуурдаж амь насанд нь хүрсэн юм. Мөн өөрийн дагавар хүү болох монгол улсын иргэн 13 настай Т-г гэмтээсэн ноцтой хэрэг гарсан. Тэгвэл уг хятад иргэнийг ШШГЕГ-ын харьяа цагдан хорих 461 дүгээр ангид саатуулж байгаа юм байна. Түүнд Эрүүгийн хуулийн тусгай ангийн 91.2.12-т зааснаар онц хэрцгий аргаар хүний амь насанд хүрсэн хэмээн эрүүгийн хэрэг үүсгэжээ. Уг заалтад 20-25 жилийн хорих ялаар шийтгэнэ хэмээн заасан байдаг аж. Хэргийг СХД-ийн цагдаагийн хэлтэс шалгаж байна” хэмээн мэдээлж байлаа.

Хохирогч эмэгтэй шархаа даалгүй нас барлаа

2017.01.04: Хятад улсын иргэн дөрөвхөн настай хүүг заазуураар зүсч, амь насыг нь хохироосон хэрэг гарсан. Тухайн үедээ иргэн Ө гэгч өөрийн дагавар хүү болох 13 настай хүүхдийг ч заазуурдаж, гэмтээсэн. Тэгвэл 13 хүү ч бас нас барсан юм. Энэ талаар хэвлэл мэдээллийн хэрэгслүүд “Өнгөрсөн арванхоёрдугаар сарын 31-нд БНХАУ-ын иргэн Ө гэгч нь дөрөвхөн настай хүүг заазуурдаж амь насанд нь халдсан харамсалтай хэрэг гарсан. Уг хэрэг СХД-ийн 19 дүгээр хороонд гарсан юм. Өдгөө БНХАУ-ын иргэн Ө-г ШШГЕГ-ын харьяа цагдан хорих 461 дүгээр ангид саатуулан Эрүүгийн хуулийн тусгай ангийн 91.2.12-т зааснаар онц хэрцгий аргаар бусдын амь насанд халдсан гэх зүйл ангиар хэрэг үүсгэн шалгаж байна. БНХАУ-ын иргэн Ө нь манай улсын иргэн Х-тэй хамтран амьдраад гурван жил болж байжээ. Х нь 13 настай хүүтэй бөгөөд тэд гурвуулаа айлын хажуу өрөө хөлслөн амьдардаг байсан аж. Харин хэрэг гардаг өдөр Х-гийн дүү нь хүүхдээ түр харуулахаар дөрвөн настай хүүхдээ тэднийд үлдээгээд явсан байна. Тухайн үед эхнэр, нөхөр хоёр хамтдаа шинэ жилийн баяр тэмдэглэн архидан согтуурч, улмаар хоорондоо маргалдсан байна. Гэтэл Ө гэгч нь заазуур аван эхнэрээ цохиж гэмтээжээ. Харин хүү ээжийгээ хамгаалж байх зуур өрөөнд унтаж байсан дөрвөн настай хүүхдийг зүсэж гэмтээснээр хүү газар дээрээ амь насаа алдсан аж. Цагдаа нар шөнийн 02:00 цагийн орчимд хэргийн газарт очиж сэжигтнийг баривчлан, ээж хүү хоёрыг ГССҮТ-д хүргэжээ. Хохирогч нарыг эмнэлэгт хүргэх үед 46 настай Х эмэгтэйн толгойн баруун хэсэгт гурван удаагийн иртэй зүйлийн гүн зүсэгдэлттэй, 13 настай хүүгийн зүүн гар, шууны хэсэгт хоёр удаагийн зүсэгдэлттэй гэмтсэн байжээ. Эмч нар хүүг яаралтай хагалгаанд оруулсан бол Х нь шархаа даалгүй нас барсан байна. Хэргийг СХД-ийн цагдаагийн хэлтэст үргэлжлүүлэн шалгаж байна” хэмээн мэдээлж байлаа.  

н.Өргөнтал гэгч орчуулагч байжээ

2017.01.06: Сонгинохайрхан дүүргийн 19 дүгээр хороонд өнгөрсөн сарын 30-31-нд шилжих шөнө БНХАУ-ын харъяат иргэн архидан согтуурсан үедээ өөрийн эхнэр болон мөн тухайн үед гэрт нь байсан дөрвөн настай  хүүг онц хэрцгий аргаар буюу заазуурдан хөнөөж, 13 настай дагавар хүүг гэмтээсэн аймшигт хэрэг гарсан тухай бид өмнө нь мэдээлж байсан. Тэгвэл уг хэргийг Хятадын хөрөнгө оруулалттай уул уурхайн чиглэлээр үйл ажиллагаа явуулдаг “Дуа Ди” гэх компанид орчуулагч ажилтай н.Өргөнтал гэгч БНХАУ-ын ӨМӨЗО-ы Хорчин зүүн үзэмчин хошууны иргэн үйлджээ. Тэрбээр манай улсад анх 2007 онд орж ирсэн бөгөөд “Жигүүр гранд”, “Бэрэн” зэрэг компанид хятад ажилчдын орчуулагчаар ажиллаж байсан нэгэн гэнэ.  Түүнийг хуулийн байгууллагаас яллагдагчаар татаж, Эрүүгийн хуулийн 91 дүгээр зүйлд заасан танхайн сэдэлтээр, онц хэрцгий аргаар хоёр буюу түүнээс дээш хүнийг хөнөөсөн, 96 дугаар зүйлд заасан бусдын бие махбодид хүнд гэмтэл санаатай учруулсан хэмээн буруутгаж буй юм байна.

Хэрэгтэн н.Өргөнтал хохирогч Х-тэй 2014 онд гэрлэлтээ батлуулжээ

2017.01.07: Сэжигтэн н.Өргөнтал хэрэг гардаг шөнө эхнэр Х-тай хамт архи ууж маргалдан, эцэстээ заазуур барьж дайран, тэднийд хонохоор ирсэн дөрвөн настай хүүг эхнэрийнхээ хамт хөнөөжээ. Улмаар дагавар хүүгээ бүрэлгэхээр дайрах үед 13 настай Б зугтан, хөршийндөө очиж тусламж хүссэнийг хэргийг шалгаж буй Сонгинохайрхан дүүргийн Цагдаагийн I хэлтсийнхэн мэдээлэв. н.Өргөнталын эхнэр Х нь Баянхонгор аймагт 1976 онд төрсөн. 1999, 2004 онд төрсөн хоёр ч хүүтэй аж. Тэрээр “Хархорин” худалдааны төвд лангуу түрээслэн наймаа хийж амьдардаг, цэцэрлэгийн багш мэргэжилтэй нэгэн байжээ. Тэд 2008 онд танилцаж, хамт амьдарч байгаад 2014 оны зургадугаар сард гэрлэлтээ батлуулсан байна. Манай улсын хуулиар гадаадын иргэнтэй гэр бүл болоход хатуу шалгуур тавьдаг учир тэрээр гэрлэлтээ батлуулснаас хойш хоёр жил орчмын дараа буюу 2016 оны тавдугаар сард Монгол Улсад нэг жилийн хугацаагаар оршин суух зөвшөөрөл авчээ. Түүнээс өмнө өөр ангиллын виз авч манай улсад орж ирдэг байсан аж.

СЭТГҮҮЛЧИЙН ӨНЦӨГ

ХАТУУ ЗААЛТТАЙ ГЭР БҮЛИЙН ХҮЧИРХИЙЛЛИЙН
ХУУЛИЙН “ШИД”-ИЙГ ОДОО  Л ХАРЪЯ

Гэр бүлийн хүчирхийлэлтэй тэмцэх тухай хуулийн шинэчилсэн найруулгын төсөл болон холбогдох хуулийн төслүүдийг өнгөрөгч оны арванхоёрдугаар сарын 22-ны УИХ-ын чуулганы нэгдсэн хуралдаанаар баталсан. Гэр бүлийн хүчирхийлэлтэй тэмцэх тухай хуулийг ирэх хоёрдугаар сарын 1-нээс хүчин төгөлдөр мөрдөгдөж эхлэх учиртай. Яагаад гэнэт Гэр бүлийн хүчирхийлэлтэй тэмцэх хууль яриад унав гэж гайхаж магадгүй.

Өвөр Монгол эр эхнэртэйгээ маргалдсанаас болж заазуур барин дайрч, хавь ойр байсан бүх хүнийг мал аятай “нядалсан” энэ хэрэг гэр бүлийн хүчирхийллээс үүдэлтэй шүү дээ. Гэнэт л архинаас болоод заазуур барьж дайрна гэвэл бас өрөөсгөл. Өмнө нь гэр бүлийн хүчирхийлэл үйлддэг, дарамталдаг байсан нь даамжраад л ийм хэрцгий балмад байдал руу оруулсан гэж хараад байгаа юм. Түүнээс биш эхнэртэйгээ ганц хоёр удаа маргалдлаа гээд заазуур барьж, хавьтсан ойртсоноо зүсч, гар хөлийг нь тасална гэж юу байх билээ.

Мэдээж Өргөнтал гэдэг өвөрлөгч нөхрийг эрүүгийн хуулиар яллаж, ялын дээд хэмжээ оноох нь дамжиггүй. Манайх цаазын ялгүй орон. Тийм болохоор 20-25 жилийн ял оноо байх. Гэхдээ ирэх сараас эхлэн хүчин төгөлдөр мөрдөгдөж эхлэх Гэр бүлийн хүчирхийлэлтэй тэмцэх хуулийн хэр хатуу чанга заалттай болсон бэ гэдгийг энэ хэрэгт жишээ болгож, хүмүүст харуулаасай гэж бодоод байна. Цагдаагийн газраас Гэр бүлийн хүчирхийлэлтэй тэмцэх хууль ихээхэн онцлогтой гэдгийг тайлбарлаж, мэдээлсэн байсан.

Тухайлбал, Гэр бүлийн хүчирхийлэлтэй тэмцэх хууль сурталчлаад, энэ талаар сургалт мэдээлэл явуулаад байхад зөрчил гаргасан анхны тохиолдолд захиргааны хариуцлага хүлээлгэнэ. Харин удаа дараагийн үйлдэл гаргавал үүнийг гэмт хэрэг гэж үзэн албадах буюу холбогдох хуулийн дагуу хариуцлага хүлээлгэхээр заасан юм. Түүнчлэн уг хуулиар эхнэр нөхөр, үр хүүхдийн хоорондын харилцааг зохицуулах төдий бус хамтран амьдрагчид, салсан гэр бүлийн асуудлыг ч хөндөж өргөн хүрээг хамарсан.

Гэр бүлийн хүчирхийллийн талаарх мэдээллийн сувгуудыг тэлэх, тэр дундаа хөршийн үүргийг тодорхойлж, удаа дараагийн гэмт үйлдлийг мэдээлээгүй айл хөршид хариуцлага тооцохоор хуульд тусгасан. Мөн гэр бүлийн хүчирхийлэлд өртсөн хохирогчдод түр хамгаалах байр, нэг цэгийн үйлчилгээ үзүүлэх, хамтарсан баг хэрхэн ажиллах зэрэг бүх зохицуулалтыг тодорхой болгосон өгчээ. Өмнөхөө бодвол чангарсан. Хэрвээ эхний удаадаа гэр бүлийн хүчирхийллийн шинжтэй үйлдэл гаргавал торгоно.

Давтан үйлдвэл баривчилна. Өмнөх шиг эхнэрээ балбачихаад, цагдаа ирж өнөөх нөхрийг эрүүлжүүлээд, явуулдаг. Мань хүн гэртээ ирээд “Цагдаад барьж өглөө” гэх шалтгаанаар дахиад л зодож нүддэг байдал энэ хууль хэрэгжсэнээр эцэс болох учиртай. Хууль чанга биш учраас л гэр бүлийн хүчирхийлэл үйлдэгсэд давраад, эцэстээ энэ мэт яргачин шиг заазуур барьж, хэнийг ч хамаагүй тааралдсанаа хөнөөж байгаа юм шүү дээ.

Харин шинэ хуулиар энэ мэт асуудалд хүргэх хэмжээнд тулахаас өмнө шийдвэрлэж байхаар боллоо. Хамгийн гол нь үүнийг хүчирхийлэл үйлдээд байгаа, түүнээсээ таашаал авдаг, сэтгэц нь өөрчлөгдчихсөн арчаагүй амьтдад ойлгуулж өгөх хэрэгтэй байна. Тэр дундаа гадаадын иргэн Монголд ирж, охид бүсгүйчүүдтэй гэрлэчихээд, гэр бүлийн хүчирхийлэл үйлдэж, заазуур барьж танхайраад, дураараа авирлаад байж болдоггүй юм шүү гэдгийг ойлгуулаасай билээ. Одоо л мэдрүүл, хуулиа ашигла, сайн ойлгуул. Гэр бүлийн хүчирхийлэл үйлдэж байгаа нөхдүүдийг чичиртэл нь ойлгуулмаар байна.