Туркид энэ оны долдугаар сард цэргийн эргэлт хийх оролдлого гарсны дараа онц байдал тогтоосон байдаг. Гэвч цэргийнхэн бэлэн байдалд ажиллаж буй энэ үед тус улсын Истанбул хотод өнгөрөгч бямба гарагт хөлбөмбөгийн талбайн орчимд хоёр ч удаагийн цуврал дэлбэрэлт болсны улмаас 38 хүн амь үрэгдэж, 166 хүн гэмтэж бэртлээ.

 Нас барагсдын ихэнх нь цагдаагийн ажилтнууд байжээ. Дэлбэрэлт Истанбулын “Бешикташ” багийн Водафоне аренагийн  ойролцоо болсон байна. Тус талбайд “Бешикташ” болон “Бурсаспор” багийн тоглолт дууссаны дараа цэнгэлдэхийн гадна эхний дэлбэрэлт болж, үүнээс нэг ч минут өнгөрч амжаагүй байхад ойролцоох Мака паркийн  орчимд мөн нэг эрэгтэй амиа золиосолжээ.

Дэлбэрэлтийн дараа тус улсын Дотоод хэргийн сайд Сулейман Сойлу хэвлэлийн бага хурал зарлаж, нас барагсдын 30 нь цагдаа, долоо нь энгийн иргэн, нэгийнх нь хэн болохыг нь тогтоогоогүй байгаа гэж мэдэгдсэн байна. Мөн хэрэгт сэжиглэн олон хүнийг баривчилжээ. 

Тэгвэл хэргийн хариуцлагыг курдын босогчид хүлээхээ мэдэгдэн, тус халдлагыг зохион байгуулсан гэдгээ хүлээгээд байна.  Туркийн хамгийн том хот Истанбулд болсон халдлагын дараа Ерөнхийлөгч Ресеп Тайип Эрдоган террористуудын эсрэг эцсээ хүртэл тэмцэхээ мэдэгдээд байгаа билээ.