АНУ-ын Ерөнхийлөгчийн сонгууль энэ сарын 8-нд явагдаж, Бүгд найрамдах намаас нэр дэвшсэн үл хөдлөх хөрөнгийн тэрбумтан Доналд Трамп ялалт байгуулж, тус улсын 45 дахь төрийн тэргүүнээр тодорсон билээ.  Одоогийн Ерөнхийлөгч Барак Обамагийн бүрэн эрхийн хугацаа ирэх оны нэгдүгээр сард дуусч, Доналд Трамп мөн сарын 20-нд тангарагаа өргөх юм.  Улмаар тангараг өргөснийхөө дараа өөрийн багаа бүрдүүлэн, улс төрийн томилгоогоо хийх учиртай. Тэгвэл одооноос үл хөдлөх хөрөнгийн тэрбумтан эр өөрийн кабинетээ бүрдүүлж эхэлсэн төдийгүй, түүний багийн чухал чухал албан тушаалд томилогдох эрхмүүдийн нэрс эхнээсээ тодорч эхлээд байна. Ингэхдээ Д.Трампын баримталж буй байр суурь нь тун өвөрмөц байх бөгөөд багтаа өөрийг нь дэмжигчдийг илүүтэй нэгтгэсэн нь олны анхаарлыг татаад байгаа юм. Ингээд Трампын кабинетыг сонирхуулж байна.

АНУ-ын Тагнуулын төв газрын дарга

Үл хөдлөх хөрөнгийн магнат Доналд Трамп АНУ-ын Тагнуулын төв газрын даргын албан тушаалд Майк Помпеог томилжээ. Түүний хувьд Кансас мужийн ИТХ-д сонгогдож байснаас гадна армийн офицероор ажиллаж байсан туршлагатай аж.  Мөн Тагнуулын төв хорооны гишүүнээр ажиллаж байхдаа Ливийн Бенгази хотод 2012 онд болсон халдлагатай холбогдуулан  Хиллари Клинтоныг хурцаар шүүмжилж байжээ. Доналд Трамп Ерөнхийлөгч болсныхоо дараа АНУ-ын аюулгүй байдалд олон талт, цогц үйл ажиллагааг хэрэгжүүлэхээ амласан удаатай. Тиймээс шинэ Тагнуулын төв газрын дарга одоогийн тэргүүн Жон О Бреннаны энэ жилээс хэрэгжүүлж эхэлсэн  “шинэчлэл”-ийн төлөвлөгөөг  цуцлахаас гадна эсрэгээр хатуу байцаалт явуулах арга барил буюу эрүүдэн шүүлтийг   дахин сэргээж болзошгүй хэмээн зарим ажиглагчид таамаглаж байгаа юм.

Ерөнхий прокурор

Доналд Трамп сонгуулийн сурталчилгааныхаа үеэр Төрийн нарийн бичгийн дарга асан Хиллари Клинтоныг “шоронд явуулна” хэмээн сүрдүүлж байсан удаатай. Тэгвэл Ерөнхий прокуророор өөрийн талын хүнийг томилсноор түүний хууль, шүүхийн байгууллагыг шинэчлэх  мөрийн хөтөлбөр биелэх боломжтой болно. Тэгвэл энэ албан тушаалд Трамп Алабама мужийн сенатч Жефф Сешнсыг томиллоо.  Жефф Сешнс шинэхэн төрийн тэргүүний цагаачлалын эсрэг бодлогыг дэмжигч юм.

Үндэсний аюулгүй байдлын зөвлөх

Үндэсний аюулгүй байдлын зөвлөх бол кабенитын гишүүн биш. Гэхдээ Төрийн департмэнт болон Пентагон, бусад агентлагуудын гаргасан санал шийдвэрүүдийн чухал хянагч нь юм. Доналд Трамп цэргийн алба хаасан туршлагагүй нэгэн. Тиймдээ ч, Батлан хамгаалах хийгээд үндэсний аюулгүй байдлын салбарт ихээхэн анхаарал хандуулж байгаагийн илрэл нь Майкл Т.Флиннийг Үндэсний аюулгүй байдлын зөвлөхөөрөө томилсон явдал юм. Майкл Флинн тэтгэвэртээ суусан армийн генерал бөгөөд Батлан хамгаалах яамны Тагнуулын агентлагын даргаар ажиллаж байв.  Тэрбээр Доналд Трампын лалын улс бүлэглэлийн эсрэг үзэл баримтлалыг тууштай дэмжигч ажээ.

Ерөнхийлөгчийн тамгын газрын дарга

Цагаан ордны албан хаагчдын дарга буюу Ерөнхийлөгчийн тамгын газрын даргаар Бүгд Найрамдах намын /БНН/ Үндэсний хорооны дарга Райнс Прибусыг томилсон байна.  Тэрбээр  штабын ажлыг удирдахаас гадна Ерөнхийлөгчийн хэлэлцэх асуудал, төлөвлөгөөг удирдан зохион байгуулах  үүрэг хүлээсэн хүн юм. БНН-ын удирдлагатай ойр харилцаатай байдаг Р.Прибусыг дээрх албан тушаалд томилсон нь Д.Трамп нам доторх санал зөрчилдөөнийг намжааж, өөрийн засаг захиргааны ажлыг аядуу тайван байдлаар эхлүүлэхийг хүсч байгааг харууллаа гэж ажиглагчид үзэж байна. Энэ нь Трампын хувьд мөн л чухал томилгоо байв.

Ахлах зөвлөх

Доналд Трамп өөрийн ахлах стратегич буюу ахлах зөвлөхөөр Стивен Бэннонийг томилжээ. С.Бэнноны хувьд  Д.Трампын сонгуулийн штабын даргаар ажиллаж байсан юм. АНУ-ын баруун жигүүрийг баримтлагч “Брейтбарт” хэвлэлийн ерөнхий захирлаар ажиллаж байсан тэрбээр БНН-ын бүтэц үйл ажиллагааг шүүмжлэгч бөгөөд намын зарим гишүүд нь түүнийг арьс өнгөөр ялгаварлан гадуурхагч гэж нэрлэдэг байна.

Төрийн нарийн бичгийн дарга

Одоогоор Доналд Трампыг Ерөнхийлөгчийн тангарагаа өргөсний дараа Төрийн нарийн бичгийн даргаар хэн ажиллах нь тодорхойгүй байгаа ч, олны анхаарлын төвд буй томилгооны нэг нь яах аргагүй мөн. Тэгвэл хамгийн сүүлд авсан мэдээллээр эл албан тушаалд томилогдох магадлал өндөртэй эрхмүүдийн тоо аль хэдийнэ долоо болсон байв. Тодруулбал, Ерөнхийлөгч асан Жорж В.Бушийн үед НҮБ-д төлөөлөгчөөр сууж байсан Жон Р.Болтон, Сенатын Гадаад харилцааны зөвлөлийн дарга, Теннеси мужийн сенатч Боб Коркер, Нью-Йорк хотын захирагч асан Рудольф В.Жулиани, Өмнөд Каролина мужийн захирагч Никки Р.Халей, АНУ-аас Афганистанд суух Элчин сайд асан Залмай Халилзад, Афганистан дахь цэргийн командлагч асан Стэнли МакЧристал, Массачусетс мужийн захирагч асан, 2012 оны Ерөнхийлөгчийн сонгуульд Бүгд найрамдах намаас дэвшигч Митт Ромни нарын нэр тус албан тушаалд яригдаж байна. Гэхдээ хамгийн магадлал өндөртэй нь Митт Ромни байгаа тухай эх сурвалжууд онцолж байгаа юм. Учир нь саяхан Доналд Трамп түүнтэй гольфын талбайд уулзсан гэнэ. Тэд ойролцоогоор 90 минут орчим уулзсан ч, аль аль нь Төрийн нарийн бичгийн даргын томилгооны тухай сэтгүүлчдэд үг унагаагүй ажээ.

Төрийн сангийн нарийн бичгийн дарга

Төрийн сангийн нарийн бичгийн дарга санхүүгийн зах зээл дэх Засгийн газрын зээл, татварын хууль тогтоомжийг дахин боловсруулахад  хийгээд дотоодын орлогод хяналт тавих үүргийг гүйцэтгэнэ. Мөн Төрийн сан нь гадаадын зарим орнуудын эсрэг авсан эдийн засгийн хориг арга хэмжээг  хэрэгжүүлэх болон цуцлах үүргийг гүйцэтгэдэг ажээ. Тэгвэл энэ чухал албан тушаалд одоогоор дөрвөн эрхмийн нэр яригдаж байна. Тухайлбал, Колони капитал хөрөнгө оруулалтын фирмийн үүсгэн байгуулагч, гүйцэтгэх захирал Томас Баррак, Техасын төлөөлөгч, Цагаан ордны Санхүүгийн хорооны дарга Жеб Хенсарлин, Д.Трампын сонгуулийн кампанитын санхүүжилт хариуцсан дарга Стевен Мнучин, Миннесота мужийн захирагч асан Тим Пауоленти нарын хэн нэгэн нь уг албан тушаалд томилогдож магадгүй байгаа юм.

Батлан хамгаалахын нарийн бичгийн дарга буюу Пентагоны дарга

Шинээр томилогдох Батлан хамгаалахын нарийн бичгийн дарга цэргийн үйл ажиллагаа хийгээд Лалын улс бүлэглэлийн эсрэг явуулж буй арга хэмжээнд хяналт тавих үүрэг хүлээнэ. Тэгвэл энэ албан тушаалд Ирак, Афганистаны дайнд армийн офицерын үүрэгтэйгээр оролцож байсан Аркансас мужийн сенатч Том Коттон, Үндэсний аюулгүй байдлын зөвлөх асан Стефен Хадли, Ирак, Афганистаны дайнд усан цэргийн офицероор ажиллаж байсан Дункан Хантер, Аризона мужийн сенатч асан Жон Кил, АНУ-ын Төв командлалын командлагч асан Жэймс Маттис нар нэр дэвшиж байна.

Дотоод хэргийн нарийн бичгийн дарга

Энэ албан тушаалд нийтдээ дөрвөн хүний нэр одоогийн байдлаар яригдаж байгаа юм. Тодруулбал, Аризона мужийн захирагч асан Жан Бревер, хөрөнгө оруулагч Роберт Грэйди Грифон, Аласка мужийн захирагч асан Сара Палин, Лукас газрын тос, хийн компанийн гүйцэтгэх захирал Харолд Хамм нар нэр дэвшиж байгаа юм байна.

Хөдөө аж ахуйн асуудал эрхэлсэн нарийн бичгийн дарга

Дараагийн хөдөө аж ахуйн асуудал эрхэлсэн нарийн бичгийн дарга АНУ-ын аж ахуйн салбарт хяналт тавьж, хүнсний бүтээгдэхүүний чанарыг шалгаж, орлогод суурилсан хүнсний туслалцаа үзүүлэг чиг үүргийг гүйцэтгэнэ. Тэгвэл энэ албан тушаалд Кансас мужийн захирагч Сэм Браунбэк, Фэрмерүүдийн хоршоодын Үндэсний зөвлөлийн гүйцэтгэх захирал Чук Коннер, Техасын хөдөө аж ахуйн комиссар Сид Миллер, Жоржиа мужийн захирагч асан Сонни Перди нарын нэр яригдаж байна.

Худалдааны нарийн бичгийн дарга

Худалдааны нарийн бичгийн албан тушаалд одоогийн байдлаар хоёр эрхмийн нэр яригдаж байгаа юм. Худалдааны яамны зарим үйл ажиллагаанд хяналт тавих үүргийг гүйцэтгэх энэхүү албан тушаалын төлөө Нукор корпорацийн гүйцэтгэх захирал асан Дан ДиМикко, Гранит Капитал группын ерөнхийлөгч Луйс Эйсенберг нар нэрээ дэвшүүлжээ.

Хөдөлмөрийн нарийн бичгийн дарга

Хөдөлмөрийн яамны хууль дүрмийн дагуу хөдөлмөр эрхлэгчдийн эрх ашгийг хамгаалах, ажилгүйдлийн тэтгэмжийг олгох хийгээд сар бүр ажлын байрны эдийн засгийн тайлан мэдээллийг гаргах үүрэг бүхий энэхүү албан тушаалд 2010 оноос хойш Америкийн иргэдийг ажил эрхлэх тэгш боломжоор хангах комиссын комиссараар ажиллаж буй Виктория Липник гэх эмэгтэй нэр дэвшчээ.

Боловсролын нарийн бичгийн дарга

АНУ-ын шинэхэн Ерөнхийлөгч Доналд Трамп Боловсролын яамны  үйл ажиллагааг танах бодлого баримталж буй аж. Энэ утгаараа төрийн болон орон нутгийн засаг захиргааны нэгжид сургалт судалгаа, хөгжил, боловсролын тусламж үйлчилгээний асуудлыг шилжүүлэх байр суурьтай байгаа юм байна. Тэгвэл дараагийн Боловсролын нарийн бичгийн даргын албан тушаалд Новер институтын боловсролын шинжээч Вильямсон Эверс яригдаж буй ажээ.