АНУ-ын Ерөнхийлөгчийн сонгууль энэ сарын 8-ны өдөр явагдаж, улс төрийн туршлагагүй “нялх” улстөрч Д.Трамп  Төрийн нарийн бичгийн дарга асан Хиллари Клинтоныг өвдөг шороодуулан ялалт байгуулж, дэлхий нийтийг цочирдуулсан билээ.

Улмаар шинэхэн Ерөнхийлөгчөөр тодроод буй үл хөдлөх хөрөнгийн бизнесмэн эр тангараг өргөснийхөө дараа хэнийг ямар албан тушаалд томилох нь олон нийтийн анхаарлыг татаж эхлээд байна. Тэгэхдээ түүний гэр бүл хамаатан садан чухал албан тушаалд томилогдох магадлал өндөр байгааг зарим эх сурвалж онцолж байгаа юм.

Тэгвэл хамгийн түрүүнд Трампын хуучин эхнэр Ивана Трамп нэлээд өндөр албан тушаалд томилогдох бололтой. Бүсгүй өөрөө Нью-Йорк пост сонинд өгсөн ярилцлагадаа “Би Чех улсад суух онц бөгөөд бүрэн эрхт Элчин сайдад өөрийгөө санал болгоно” гэж ярьсан гэнэ. 

Тэрбээр  бизнесмэн эрийн анхны эхнэр бөгөөд  гурван ч хүүхдийг нь төрүүлж өгчээ.  Бизнесмэн, зохиолч, нийгмийн зүтгэлтэн хийгээд загварын тайзнаа нэгэн үе алхаж явсан Ивана Трамп өөрөө чех гаралтай. Тиймээс ч, энэ албан тушаалд өөрийгөө санал болгож байгаа аж.