Сагсан бөмбөгийн Азийн Аваргуудын Лигийн Зүүн бүсийн урьдчилсан шатны тэмцээнд аваргын цомыг нь өргөсөн "Хасын Хүлэгүүд" баг  Арабын Нэгдсэн Эмират Улсын Дубай хотноо Сагсан бөмбөгийн Азийн Аваргуудын лигт /Basketball champions league asia/ өрсөлдөх юм.

Сагсан бөмбөгийн Азийн Аваргуудын лигт 9 улсын баг оролцох бөгөөд гурван хэсэгт хуваагдана. Манай залуус "А" хэсэгт БНХАУ-ын "Жэцзян Лайонс", Ираны "Табиат" багуудтай нэг хэсэгт орсон бөгөөд өнөөдөр БНХАУ-ын "Жэцзян Лайонс" багтай тоглож 84-67 харьцаагаар хожлоо.  Тус тоглолт Иан Миллер 30 оноогоор багаа тэргүүлсэн бол Ч.Ихбаяр 18 оноогоор тусалсан байна.

Манай залуус ийнхүү эхний хожлоо байгуулснаар 2 оноотойгоор А хэсгийг тэргүүлж эхэлсэн бол дараагийн тоглолтоо зургадугаар сарын 9-ны орой 19:00 цагт Ираны "Табиат" багтай тоглоно.

Тус тэмцээний хэсгийн шатанд хамгийн тааруу амжилт үзүүлсэн 1 баг хасагдаад шөвгийн наймаас эхлүүлэн багууд хасагдах журмаар явсаар аваргаа тодруулах юм.