2024 он гарсаар дэлхий даяар улаанбурхан өвчний халдвар эрчимтэй дэгдэж байна.

Үүнээс улбаатай Япон улсын эрүүл мэндийн салбарынхан улаанбурхан өвчний халдвараас сэргийлэх вакцинд хамрагдах, эрүүл мэндийн байгууллагын үнэн зөв мэдээлэлд тулгуурлаж эмнэлэгт хандахыг иргэдэд уриалж байна.

Улаанбурхан нь өндөр дэгдэмхий, зүй зохистой эмчлэхгүй бол үхэлд ч хүргэж мэдэх халдварт өвчин юм.

Япон улсад өнгөрсөн сараас эхэлж улаанбурхан өвчний халдвар нэмэгдсэн гэсэн мэдээлэл байна.

Одоогоор Японы эрх баригчид Осака мужийн Кансаи нисэх онгоцны буудалд гарсан улаанбурхан өвчний халдварын голомт дээр төвлөрч, цааш дэгдэхээс сэргийлэх арга хэмжээ авч ажиллаж байна.

Киото хотын оршин суугч нэг эрэгтэй өнгөрсөн сард тус онгоцны буудал дээр очиж, Арабын Нэгдсэн Эмират улсаас ирсэн нэг зорчигчтой харилцан, ойрын хавьтал болсон байж болзошгүй, энэ долоо хоногийн эхээр шинжилгээ өгөхөд улаанбурхан өвчний вирусээр халдварласан байсан нь тогтоогдсон гэж мэдээлжээ.

Тус нислэгээр ирсэн өөр 8 хүн бас улаанбурхан өвчний шинжилгээ өгөхөд эерэг гарчээ. Улаанбурхан өвчний халдвар авсан хүнд халуурах, ханиалгах, тууралт гарах, нүд улайх зэрэг шинж тэмдэг илэрдэг.

Хүндэрсэн тохиолдолд уушгины хатгалгаа болох эрсдэлтэй. Мөн "Ковид-19" зэрэг халдварт өвчний вирусээс илүү өндөр дэгдэмхий чанартай. Улаанбурхөн өвчнөөр өвдсөн мянган хүн тутмын нэг нь нугасны үрэвсэл болж хүндрэх эрсдэлтэй.

Нугасны үрэвсэл болбол үхлийн аюултай гэдгийг эмч, эрүүл мэндийн салбарынхан анхааруулж байна.

Өнөөг хүртэл Япон улсад улаанбурхан өвчний вакцинжуулалтад бага насны хүүхдүүдийг хамруулдаг байсан. 2015 оны байдлаар Япон улс үндэсний хэмжээнд улаанбурхан өвчний вирусыг бүр мөсөн устгаж чадсан гэж Дэлхийн Эрүүл Мэндийн Байгууллагаас мэдээлж байсан байна.

Түүнээс хойш тус улсад гарсан улаанбурхан өвчний тохиолдлууд ихэвчлэн хилийн чанадаас ирсэн хүмүүсээс илэрч байжээ.

Харин сүүлийн үед олон улс даяар улаанбурхан өвчний дэгдэлт их байгаа нь Японы эрх баригчдын санааг зовоож байна.

Өнгөрсөн 2023 онд л гэхэд дэлхий даяар улаанбурхан өвчний 300 мянган тохиолдол бүртгэгджээ. Энэ нь 2022 оныхоос 80 хувиар өссөн үзүүлэлт юм.

Японы Кавасаки анагаахын их сургуулийн эрдэмтэд улаанбурхан өвчнөөс сэргийлэх гол арга бол вакцин гэдгийг хэлж байна.

Бага ахуйдаа улаанбурхан өвчний эсрэг вакцинд хамрагдсан хүн амьдралынхаа турш дархлаатай болсон байх нь элбэг. Энэ вакциныг хоёр удаа хийлгэсэн хүн вирусээр халдварласан хүнтэй хавьтсан байсан ч улаанбурхан өвчний шинж тэмдэг илэрдэггүй байна.

Улаанбурхан өвчний дэгдэлттэй холбоотой эрх баригчдын санааг зовоож байгаа бас нэг зүйл нь цахим орчинд тархаж байгаа худал мэдээлэл гэнэ. Зарим хүн улаанбурхан өвчнийг хөнгөн, вакцин хийлгэх шаардлагагүй гэсэн мэдээлэл тарааж байгаа аж.

Мөн улаанбурхан өвчний халдвар авч байгалиараа дархлаа тогтоохыг уриалсан эндүү ташаа мэдээлэл тараасан хүмүүс ч байгаа юм байна.

Тиймээс эрх баригчид иргэдийг эмнэлгийн байгууллагын албан ёсны мэдээллийг үзэж байхыг зөвлөсөн байна.