АНУ-ын ирэх арваннэгдүгээр сард болох Ерөнхйилөгчийн сонгуульд Бүгд найрамдах намаас нэр дэвшиж буй үл хөдлөх хөрөнгийн тэрбумтан Доналд Трампын эмэгтэйчүүдийг зүй бус үгээр гутаан доромжилж буй хуучны бичлэг цацагдсаны дараа нам нэгтнүүд нь түүнээс нүүр буруулж эхэлсэн билээ.

Олон нийтийн зүгээс ч түүнийг сонгуулийн өрсөлдөөнөөс буцаан татахыг шаардах болсон. Тэгвэл тус намаас нэр дэвшин Калифорнийн захирагч болж байсан жүжигчин Арнолд Шварценеггер Трампыг эсэргүүцэгчдийн жагсаалтад нэгдсэн байна.

Тэрбээр өөрийн инстаграмм хуудастаа нэгэн мэдэгдлийн байршуулсан байсан бөгөөд түүндээ Доналд Трампын нэрийг хэдийгээр дурьдаагүй байсан ч, Цагаан ордны тэргүүний төлөөх сонгуульд Бүгд найрамдах намаас нэр дэвшигчийг дэмжихгүй гэдгээ тов тодорхой илэрхийлсэн байв.

Калифорни мужийн амбан захирагч асан тэрбээр 1983 онд АНУ-ын иргэншил авснаас хойш анх удаагаа Бүгд Найрамдах намын нэр дэвшигчийг дэмжихгүй гэдгээ илэрхийлсэн нь энэ юм.